“Анаабыр алмаастара” үҥкүү ансаамбыла Кытайга баран кэллэ

 Аар саарга аатырбыт, элбэх омук сиригэр сылдьыбыт «Анаабыр алмаастара” үҥкүү ансаамбылын салайааччытын,  олоҕун үҥкүү эйгэтигэр анаабыт Яна Николаевна Спиридонованы  урут култуура эйгэтигэр алтыспыт буолан, үөрэ көрүстүм. Анаабырга тиийдэххинэ, таба сүүрдүүтүгэр, бырааһынньыктарга, көрсүһүүлэргэ оҕуруо, симэх киэргэллээх  кэрэчээн кыргыттар-уолаттар олус имигэстик туттан үҥкүүлүүллэрэ көрүөхтэн кэрэ  да буолара.

Анаабыр олохтоохторо үҥкүүһүт оҕолорунан киэн тутталлар. Дьэрэкээн оһуор таҥастаах ансаамбыл кыттыылаахтара өрөспүүбүлүкэҕэ  кэнсиэртэргэ  кытыннахтарына,  дьон  биһирэбилин ылыан ылаллар. Яна Николаевна Усуйаана  Хаһааччыйа оройуонугар, аҕатын дойдутугар күн сирин көрбүтэ. Сааскылах орто  оскуолатыгар  үөрэнэн, 1985 с. култуурунай-сырдатар училищены бүтэрэн баран, 2007 с.  Култуура уонна ускуустуба Илин-Сибиирдээҕи судаарыстыбаннай академиятын бүтэрбитэ.

“Анаабыр алмаастара” ансаамбыл 2001 сыллаахха тэриллэн,  күн бүгүҥҥэ диэри  өрөспүүбүлүкэҕэ киэҥник биллэр кыахтаах кэлэктиип. Кэрэ үҥкүүлэрдээх буолан, бу күннэргэ “Бохайский залив” диэн үҥкүү куонкуруһунан  дьарыктанар “Атлас” фирма ыҥырыытынан Кытайга баран кэллэ.

Ансаамбыл  15 омук сиригэр, ол иһигэр  Испанияҕа, Грецияҕа, Израильга, Японияҕа, о.д.а сирдэргэ  сырытта. Үҥкүүгэ билигин 30 ыччат, Далбар хотуттар дьарыктаналлар. Яна Николаевна хамсык да  саҕана үҥкүүгэ оҕолору дьарыктыырын тохтоппотоҕо, ыраахтан үлэлии олорбута.

Кини  4 оҕолоох, сиэннэрдээх. Оҕолор үҥкүү эйгэтигэр улааппыт буолан, бары айар куттаахтар. Кыра кыыс Зарина үҥкүү идэтин талан, үөрэнэ сылдьар. Яна Николаевна аймах оҕолоро урут үҥкүү куруһуогар сылдьыбыт буоланнар, аны билигин кинилэр оҕолоро, сиэннэр эмиэ үҥкүүлүүллэр. Яна Николаевна кэргэнэ Спиридонов Василий Николаевич сааһын тухары бэнсиин  таһар улахан массыынаҕа үтүө суобастаахтык үлэлээбитэ. Соһумардык олохтон туораан, дьиэ кэргэн улахан охсууну ылбыта. Ол да буоллар,  ыал ийэтэ Яна Николаевна  оҕолорун атахтарыгар туруоран, аһыытын үлэнэн оһорунан кэллэ.

Саха Өрөспүүбүлүкэтин култууратын туйгуна, ”Хотугу дойдуга өҥөтүн иһин”  бэлиэ хаһаайката Яна Спиридоновнаҕа үлэтигэр ситиһиини, доруобуйаны, дьолу-соргуну баҕарабыт.

Галина БОРИСОВА-ТОЛБООНО