“Анаабыр алмаастарыгар” махтаналлар

Өлөөн улууһугар бэҕэһээ бөртөлүөт көтөн, сүппүт табалары булууга көмөлөстө.

Бүгүн “Өлөөн” МУП зоотехнига Марина Николаева маннык иһитиннэрдэ:

— Алтынньы 13 күнүгэр ыстаадалар СМС ыыппыттара. Ол кэнниттэн МУП дириэктэрэ А.А.Винокуров, Өлөөн улууһун баһылыга И.А.Саввинов суһаллык дьаһал ыларга быһаарыммыттара. Иван Саввинов “Алмазы Анабара” хампаанньаны кытта бөртөлүөтү көтүтэргэ кэпсэппитэ. Былырыын кыыл табалар дьиэ табаларын илдьиилэригэр даҕаны тэрилтэлэр эмиэ кыахтарынан бу уустук кэмҥэ көмөлөспүттэрэ. Быйыл эмиэ тэрилтэлэрбит биэс буочука бэнсиини биэрдилэр. Онон ыраах сытар үс ыстаадабытыгар бэнсиини эҥин тиэртилэр. Хайа уона дьон тиийдэҕэ дии. Москваттан спутниковай ошейнигынан барытын көрө олороллор, спутниковай каарта ыыталлар. Биһиэхэ хас да үөр бөрө сылдьар. Айылҕа уларыйан, кыыл-сүөл да майгыта уларыйда. Кыыл табабыт да төттөрү эргиллиэн сөп. Бу көтүү түмүгэр табалары булбуттар, сороҕун да булуохтара. Онон, түгэнинэн туһанан, “Алмазы Анабара” хампаанньаҕа, чуолаан, генеральнай дириэктэригэр Алексей Алексеевич Окороковка былырыын да, быйыл да көмөлөспүттэрин иһин махтанабыт. Уонна, биллэн турар, “АЛРОСА” АК-га.