«Анаабыр» эрэгийиэннээҕи айан суола саҥардыллар

«Анаабыр» эрэгийиэннэҕи массыына суолугар «Бүлүү» федеральнай айан суолуттан Мииринэй куоратыгар диэри 11 килэмиэтиртэн тахса уһуннаах хапытаалынай өрөмүөн ыытыллар. Бу эбийиэк дойду Бэрэсидьиэнэ Владимир Путин көҕүлээбит «Олох-дьаһах инфраструктурата» нацбырайыагынан икки түһүмэҕинэн олоххо киирэр.

Саха сиринээҕи суол управлениета үлэлэр болдьохтон хаалбакка баралларын бигэргэттэ. Бастакы түһүмэх 7,7 км-тэн 11,6 км-гэ диэри учаастагы хабар уонна «АЛРОСА» АК МУАД бэдэрээччигинэн оҥоһуллар. Бэлэмнэнии тэрээһиннэрэ түмүктэннилэр. Ол курдук, туоруур суоллар оҥоһулуннулар, тимир гофрированнай турбалар туруорулуннулар, эргэ аспаал ыраастанна диэн СӨ Тырааныспар министиэристибэтэ иһитиннэрэр. Билигин исписэлиистэр суол аллараа араҥатын уурууну түмүктүүллэр. Онно 50 киһи уонна 21 анал тиэхиньикэ үлэлиир.

Бастакы кэрчик хапытаалынай өрөмүөн үлэтэ, 4 км кэриҥэ уһуннаах суол 2027 сылга түмүктэнэрэ былааннанар. Аныгы бүрүөһүннээх саҥа аспаал суол ууруллуоҕа. Ону таһынан, оптуобус тохтобуллара, сатыы киһи хаамар суоллара, тас сырдатыы уонна суол бэлиэлэрэ саҥардыллыахтара.

11,6 килэмиэтир уһуннаах айан суола 2030 сыл бүтүүтэ толору чөлүгэр түһэриллиэҕэ уонна нуорма ирдэбиллэригэр толору сөп түбэһиэҕэ.