Анаабыр национальнай (долган-эбэҥки) улууһугар Бырабыыталыстыба отчуота саҕаланна

Бүгүн, олунньу 12 күнүттэн, Анаабыр национальнай (долган-эбэҥки) улууһугар Бырабыыталыстыба отчуота саҕаланна.

Бырабыыталыстыба бэрэссэдээтэлин солбуйааччы Анатолий Семенов салайар оробуочай бөлөҕө ааспыт сыл ситиһиилэрин уонна инники сайдыытын туһунан кэпсиэҕэ.

Бүгүн отчуоттуур бөлөх чилиэннэрэ Сааскылаах олохтоохторун кытта көрсүөхтэрэ. Сарсын Үрүҥ Хайаҕа көрсүһүү буолуоҕа.

Ону тэҥэ Анатолий Семенов Анаабыр оройуонугар тутуллар эбийиэктэргэ сылдьыаҕа уонна  СӨ Ил Дарханын стратегическай ыйаахтарыгар анаммыт сүбэ мунньаҕы ыытыаҕа.

Санатан эттэххэ, былырыын Сааскылаах оскуолатын баазатыгар орто анал үөрэх 2 салаата аһыллыбыта. Сэлиэнньэҕэ Н.Г. Чернышевскай аатынан Бүлүүтээҕи идэтийбит-педагогическай кэллиэс оскуола иннинээҕи салаата уонна “Арктика” оробуочай каадырдары бэлэмнир киин Анаабырдааҕы салаата аһыллыбыттара.  Бу көмөтүнэн улуус олохтоохторо миэстэтигэр үөрэнэр кыахтаннылар.

Ону тэҥэ Сааскылаахха саахалланар дьиэттэн көһөрүү аадырыстаах бырагырааманан элбэх кыбартыыралаах үс таас дьиэ тутуута саҕаланна.

Саха сирин ситэриилээх былааһын отчуота кулун тутар ыйга диэри ыытыллыаҕа.

Отчуот кыраапыгын манна билсиҥ: https://www.sakha.gov.ru/news/front/view/id/3480409.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата