Анаабыр олохтооҕо аймаҕын сымыйанан үлэҕэ киллэрбитинэн сууттанна

Анаабыр улууһун Сааскылаах сэлиэнньэтигэр Мииринэй оройуонун суута таһаарбыт бириигэбэрэ сокуоннай күүһүгэр киирдэ. Дьахтар сулууспалыыр балаһыанньатын туһанан, атын киһи баайын-дуолун талбытынан туһаммыт (РФ ХК 160-с ыстатыйатын 3-с чааһа) чахчынан сууттанна. Бу туһунан Саха сиринээҕи сууттарын холбоһуктаах пресс-сулууспата иһитиннэрэр.

Силиэстийэҕэ быһаарыллыбытынан, сууттаммыт дьахтар успуорт оскуолатыгар тириэньэр быһыытынан үлэлээбит, ону таһынан 2024 сыл балаҕан ыйыттан 2025 сыл олунньутугар диэри дириэктэр уоппускаҕа уонна ыалдьа сылдьар кэмигэр кини эбээһинэһин толорбут. Оскуола устаабынан, киниэхэ тэрилтэҕэ дьаһайар-тэрийэр уонна административнай-хаһаайыстыбаннай үлэ-хамнас, ол иһигэр үлэһиттэри үлэҕэ ылар уонна ууратар эбээһинэс сүктэриллибит. Үөрэх дьылын саҕаланыытыгар сууттанааччы бэйэтин аймаҕын көҥүл тустууга тириэньэр-преподаватель быһыытынан сымыйанан үлэҕэ киллэрбит. Бэйэтин үлэлиир көмпүүтэригэр кинини үлэҕэ ылар туһунан бирикээһи оҥорон, илии баттаабыт, ол эрээри эдэр киһи Дьокуускайга олорор буолан, Сааскылаах сэлиэнньэтинээҕи успуорт оскуолатыгар тириэньэр быһыытынан эбээһинэһин толорботох. Ол да буоллар, кини хамнаһын кэмигэр ыла олорбут уонна  бэйэтин көрүүтүнэн туттубут. Оскуола дириэктэрин эбээһинэһин толорооччу албын-көлдьүн дьайыылара борокуруор бэрэбиэркэтин кэмигэр арыллыбыттар. Суут сымнатар быһыылары-майгылары, ол курдук, кыра саастаах оҕолордоҕун, оҥоһуллубут хоромньуну толуйбутун, буруйун билиммитин, буруйун кэмсиммитин, үтүө характеристикалааҕын учуоттаан, дьахтарга 200 000 солкуобай кээмэйдээх ыстараап анаата.