Анаабырга «Укумни» — олохтоох бренд

Анаабыр улууһугар түргэн интэриниэт киириэҕиттэн судаарыстыбаннай электроннай өҥөлөрү оҥоруу биллэ тубуста, үөрэх хаачыстыбата үрдээтэ.

Анаабыр улууһун баһылыга Эдуард Платонов бүгүҥҥү күҥҥэ улуус сайдыытын туһунан маннык билиһиннэрдэ:

— Улууспутугар былырыын түргэн интэриниэт ситимэ 100% тардыллан киирбитэ. Анаабыр улууһугар  түргэн интэриниэт кэлиитин Ил Дархан Айсен Николаев “Хотугу Синергия” тосхолун бастакы хардыытын быһыытынан бэлиэтээбитэ. Кулун тутар 14 күнүгэр  Ил Дархан Айсен Николаев 2030 сылга диэри Саха сирин Арктика зонатыгар ыытыллар үлэ, чэпчэтии сүрүн хайысхаларын туһунан саҥа ыйаахха илии баттаабыта. Бу стратегическай суолталаах докумуон нэһилиэнньэ олоҕун хаачыстыбатын үрдэтиигэ уонна бөҕөргөтүүгэ   сүҥкэн оруоллаах  буолуоҕа.  Култуура уонна успуорт тэрээһиннэрин быһа эпииринэн ыытарбытын, нэһилиэктэрбит бары тэҥҥэ көрө-истэ олороллор. Оттон салайааччылар сүбэ мунньахтарбытын куйаар ситиминэн ыыта олоробут. Онон сайдыы харахха быраҕыллар.   

РФ Бэрэсидьиэнэ Владимир Путин Анал туһаайыытыгар олохтоох бренд буолар бородууксуйаны оҥорон таһаарыыны өйүүргэ ыҥырбыта. Биһиги олохтоох бородууксуйаны оҥорон таһаарыыга инники күөҥҥэ таҕыстыбыт.

Н.Е. Андросов аатынан муниципальнай унитарнай тэрилтэ иһинэн үүт бородууксуйатын оҥорон таһаарар сыаҕы аһан үлэлэтэбит. Оҥорон таһаарар бородууксуйабыт — 2,5%-наах пастеризацияламмыт үүт, йогурт, иэдьэгэй уонна суорат. Бородууксуйабытын үүтү сөргүтүү ньыматынан бороһуоктан оҥоробут. Сырьебутун Ижевскэй куораттан сакаастаан аҕалтарабыт. Үүт бородууксуйабыт «Укумни» брендинэн тахсар. Ол эбэтэр эбэҥки тылыттан тылбааһа – “Үүт” диэн. Бородууксуйабытын олохтоохторго атыылыыбыт уонна “Анаабыр алмаастара” АУо тэрилтэҕэ туттарабыт.

Маны таһынан, өссө биир улахан ситиһиибит — Үрүҥ Хайаҕа аҕыс кыбартыыралаах таас дьиэ тутуллан киирбитэ. Тыа хаһаайыстыбатыгар эмиэ кэккэ ситиһиилэрдээхпит. Таба иитиитинэн дьарыктанар улуус буоларбыт быһыытынан, таба ахсаанын элбэтэн, бу хайысхаҕа утумнаахтык ылыстыбыт. Онон улууспут арктическай оройуоннары кытта тэҥҥэ биһиги улууспут сайдыы суолун тутуһар.