Анал байыаннай дьайыы бэтэрээннэрэ каадыр бырагырааматынан үөрэҕи ааһаллар

Өрөспүүбүлүкэҕэ “Саха сирэ – дьоруойдар дойдулара” каадыр бырагыраматын олоххо киллэрии бара турар.

Барыл кыттыылаахтара өрөспүүбүлүкэ бөдөҥ тэрилтэлэригэр стажировканы ааһа сылдьаллар. Практическай түһүмэх алта нэдиэлэ устата, кулун тутар 12 күнүгэр диэри барар уонна үөрэнии сүрүн чааһынан буолар.  Стажировка сүрүн хайысхаларыттан биирдэстэринэн энергетика салаата буолар. Бырагыраама кыттыылааҕа,  байыаннай дьайыы бэтэрээнэ Гаврил Наумов «Якутскэнерго» ПАУоҕа стажировкатын ааһан бүтэн  эрэр. «Мин үгүһү өйдөөтүм. Олоҕу  сайдыы өттүгэр уларытар баҕа санаа үөскээтэ, эппиэтинэс үрдээтэ» диэн бэлиэтиир бырагыраамаҕа кыттан, гражданскай олоххо төннүүгэ сөптөөх быһаарыыны ылыммыт Гаврил Наумов.

Бырайыак өссө биир кыттыылааҕа, байыаннай дьайыы бэтэрээнэ Михаил Копырин Дьокуускайдааҕы пассажирдары таһар  хампаанньа үлэтин көрө-истэ сылдьар. Кини массыыналар айылҕа гааһыттан атын уматыкка көһүөн сөбүн үөрэтэр.  «Мин өрөспүүбүлүкэм, дойдум сайдыытыгар кылааппын киллэриэхпин баҕарабын. Дипломнай үлэм олус интэриэһинэй уонна көрүүлэрим олоххо киирэллэригэр эрэнэбин«, — диэн Михаил Копырин санаатын үллэһиннэ.

«Бу бары бырайыак сакасчыттарынан өрөспүүбүлүкэ бырабыыталыстыбата уонна, сүрүннээн,  Ил Дархан Айсен Николаев буолар. Биһиэхэ бу бырайыак аҥаардас дипломнай үлэни эрэ көмүскээһин буолбакка, улахан суолталаах барыл олоххо киирэрэ олус наадалаах«, — диэн Наталья Кашперская тоһоҕолоон бэлиэтээтэ.

Өрөспүүбүлүкэҕэ “Саха сирэ – дьоруойдар дойдулара” каадыр бырагыраамата олоххо киириитин сүрүн соругунан эрэгийиэҥҥэ кэскиллээх салайар каадырдары бэлэмнээһин буолар. Бырагыраама Арассыыйа бэрэсидьиэнэ Владимир Путин көҕүлээбит  «Дьоруойдар кэмнэрэ» федеральнай  бырагырааматын  салгыыта буолар.