Байыаннай дьайыы зонатыгар эбии тиэхиньикэни ыыттылар

Өрөспүүбүлүкэ суһал ыстааба анал байыаннай дьайыы кыттыылаахтарын сэбинэн-сэбиргэлинэн уонна тэрилинэн эбии хааччыйыыга үлэтин салгыыр.

«Ааспыт нэдиэлэҕэ өрөспүүбүлүкэ тэрилтэлэрин өйөбүлүнэн буойуттарга туттарарга «ЯКТ-Сокол» тиэхиньикэлэр, «ТИМИР АТ» электроэндуролар ыытылыннылар. Ону таһынан, биһиги эрэгийиэммит оҥорон таһаарааччыларыттан «Ворон» РЭБ массыыналара уонна «Мавик» 3Т, 4Т тепловизордаах БПА-лар тиэрдиллиэхтэрэ», – диэн от ыйын 30 күнүнээҕи брифиҥҥэ СӨ гражданскай оборуона дьыалаларыгар уонна нэһилиэнньэ олоҕун куттала суох буолуутун хааччыйыыга миниистирэ Дмитрий Лепчиков иһитиннэрдэ.

Суһал ыстаап саха буойуттарыгар туттарарга гуманитарнай баһыылкалары, тырааныспары уонна тиэхиньикэни хомуйууну, тиэрдиини салгыыр. Тирэх пууннар байыаннай сулууспалаахтарыттан санааларын истэн, иһитиннэрии хомуйар үлэни ыыталлар. Дмитрий Лепчиков иһитиннэрбитинэн, бэҕэһээ Новоазовскайдааҕы тирэх пууҥҥa туттарыллар гуманитарнай таһаҕас кэлбит.

Санатан эттэххэ, 2025 сыл саҕаланыаҕыттан байыаннай дьайыы зонатыгар гуманитарнай таһаҕаһы тиэйэр хампаанньалар 33 сырыыны толорон, 113 тырааныспар сириэстибэтин тиэртилэр.