Анал дьайыы кыттыылаахтарын кэргэттэригэр көмөлөстүлэр

Ахсынньы 14 күнүгэр Дьокуускай куорат урбаанньыттара анал байыаннай эпэрээссийэ кыттыылаахтарын саҥа төрөөбүт оҕолоругар көмө аахсыйаны тэрийэн ыыттылар.

Аахсыйаҕа киин куорат быраабаларын үлэһиттэрэ эмиэ кыттыстылар. Кинилэр эрдэттэн испииһэк оҥорон бэлэмнээбиттэрэ.

Саҥа төрөөбүт оҕолорго наадалаах маллары: памперстары, оҕо аһылыгын, эмтэри, таҥаһы-сабы атыылаһан, ийэлэргэ биэрдилэр. Ийэлэр истиҥ махталларын тиэртилэр. Чахчы, маннык түгэҥҥэ кинилэргэ чугас дьонноруттан да, тэрилтэлэртэн да көмө наада буоллаҕа.

Бу социальнай аахсыйа тэрээһинин Василий Гоца уонна кини хамаандата көҕүлээн, тэрийэн ыыттылар. Бу тэрээһин СӨ Ыччат бырабыыталыстыбатын күрэһин 3 түһүмэҕин чэрчитинэн ыытылынна диэн Дьокуускай куорат дьаһалтатын пресс-сулууспата иһитиннэрэр.