Анал миэстэҕэ турбатах, быраҕыллыбыт тимир көлө иһин ыстарааптыахтара

Ил Түмэн уон бэһис (уочараттаах) пленарнай мунньаҕар Саха Өрөспүүбүлүкэтин административнай кэһиилэр туһунан Кодексатыгар уларытыылары киллэрии туһунан сокуон барыла көрүлүннэ.

Сокуон барылынан тырааныспары (ону тэҥэ бырысыаптары) оҕо эбэтэр успуорт былаһааккаларыгар, газоҥҥа, күөх зонаҕа туруоруу, ону тэҥэ саппаас чаастарга көтүрүллүбүт (алдьаммыт) тыраныыспары анал миэстэттэн атын сиргэ туруоруу иһин ыстараап олохтуур сыалтан оҥоһулунна. Быһаарыы сурукка бэлиэтэммитинэн, билиҥҥи кэмҥэ Саха сиригэр быраҕыллыбыт тырааныспардар боппуруостара сытыытык турар. Ол суолга, айан-сырыыга харгыстары, анал уонна атын тырааныспар сырыытыгар мэһэйи үөскэтэллэр, тиэргэн иһинээҕи ааһар суолу уонна тиэргэннэри хомуйууга харгыстыыллар, ону тэҥэ куорат архитектурнай көстүүтүн алдьаталлар, тупсаран оҥорууга уонна көҕөрдүүгэ мэһэйдииллэр. Итини таһынан, саппаас чаастарга көтүрүллүбүт (алдьаммыт)  тырааныспардар дьон сырыытын хааччахтыыллар уонна олохторугар-дьаһахтарыгар, ону тэҥэ тулалыыр эйгэҕэ кутталы үөскэтэллэр. Сокуон барылынан уопсайа үс көннөрүү киллэрилиннэ. Муниципальнай тэриллиилэр сирдэрин-уоттарын тупсаран оҥоруу быраабылаларынан  тимир көлөнү, тыа хаһаайыстыбатын тиэхиньикэтин, бырысыаптары туруоруу ирдэбиллэрин кэһии иһин маннык административнай ыстарааптар олохтоноллор:

• гражданнарга — биир тыһыынчаттан үс тыһыынча солкуобайга диэри;
• дуоһунастаах дьоҥҥо — биэс тыһыынчаттан уон тыһыынча солкуобайга диэри;
• юридическай сирэйдэргэ — уон тыһыынчаттан сүүрбэ тыһыынча солкуобайга диэри.

Бу дьайыыны хос оҥоруу маннык административнай ыстарааптар олохтоноллор:

• гражданнарга — үс тыһыынчаттан биэс тыһыынча солкуобайга диэри;
• дуоһунастаах дьоҥҥо — уон тыһыынчаттан уон биэс тыһыынча солкуобайга диэри;
• юридическай сирэйдэргэ — отут тыһыынчаттан биэс уон тыһыынча солкуобайга диэри.

Парламентарийдар сокуону бүтэһик ааҕыыга ылыннылар. Сокуон 2026 сыл от ыйын 1 күнүттэн күүһүгэр киирэр.