Анал олимпиада спартакиадата саҕаланна

«Дохсун» спортивнай комплекска Арассыыйа анал олимпиадатын бастакы спартакиадата буола турар. Бу спартакиада өй-мэйии өттүнэн кэһиллиилээх оҕолорго аналлаах.

Спартакиада үөрүүлээх аһыллыытыгар кыттааччылар парааттаан киирдилэр. Кинилэри Ил Түмэн бэрэссэдээтэлин солбуйааччы, «Арассыыйа анал олимпиадатын» Саха сиринээҕи салаатын бэрэссэдээтэлэ Афанасий Владимиров, «Арассыыйа анал олимпиадатын» генеральнай дириэктэрин бастакы солбуйааччы Мария Ракова, успуорт миниистирэ Леонид Спиридонов, үөрэх миниистирин солбуйааччы Степан Степанов, Арассыыйа Дьоруойа Филипп Евсеев, Арассыыйа Паралимпийскай кэмитиэтин Саха сиринээҕи салаатын бэрэссэдээтэлэ Ньургун Иванов, адаптивнай үөрэтэр комплекс дириэктэрэ Ольга Адамова эҕэрдэлээтилэр, ситиһиилэри баҕардылар.

— Мин Саха сиригэр кэлэн, инклюзивнай успуорду сайыннарар биир өйдөөх-санаалаах кэлиэгэлэрбин көрөрбүттэн олус үөрэбин. Бу күннэргэ бастакы улахан инклюзивнай күрэхтэһиилэр буолуохтара. Өрөспүүбүлүкэ бу хайысханы сайыннарарыттан биһиги олус үөрэбит. Бүгүн, сарсын бастакы чөмпүйүөннэри көрүөхпүт. Манна даҕатан эттэххэ, хас биирдии кыттааччы кыайыылаах буолар, тоҕо диэтэр, ыарахаттары аахсыбакка, бэйэтин кыайбыт киһи — чөмпүйүөн, — диэн Мария Ракова бэлиэтээтэ.

Спартакиадаҕа Алдантан, Ленскэйтэн, Амматтан, Мэҥэ Хаҥаластан, Өлүөхүмэттэн, Сунтаартан, Уус Алдантан, Дьокуускайтан хамаандалар кэлэн кытталлар. Кыайыылаах хамаанда Дагестан Өрөспүүбүлүкэтин Махачкала куоратыгар буолар Бүтүн Арассыыйатааҕы анал олимпиада түһүмэҕэр кытта барыаҕа.

Икки күн устата коррекционнай оскуолалар хамаандалара чэпчэки атлетикаҕа, пауэрлифтиҥҥэ, бадминтоҥҥа, мини-футболга, остуол тенниһигэр күрэхтэһиэхтэрэ.