Анапа сөтүө сезонугар бэлэмнэнэр

Былырыыҥҥы кулун тутардааҕы кэми кытта тэҥнээтэххэ, Анапа отелларын сайыҥҥы кэмҥэ эрдэттэн сакаастааһын аҕыйаабыт, ол да үрдүнэн отеллар син биир сөтүө сезонугар бэлэмнэнэллэр.   

Бу туһунан Арассыыйа туроператордарын ассоциацията (АТОР) иһитиннэрэр.

«Ыйытыыга кыттыбыт Анапа отеллара бары 2025 сыллааҕы сөтүө сезонугар бэлэмнэнэллэр, ким да сабыллар туһунан былааннаабат, тоҕо диэтэххэ пляжтары ыам ыйыгар диэри ыраастыахтара диэн эрэллээхтэр, ол гынан баран курорка сөптөөх иһитиннэрии тиийбэт,» — диэн АТОР матырыйаалыгар этиллэр.

Отеллар бэйэлэрэ эмиэ пляжтары ыраастыырга көхтөөхтүк кытталлар уонна үлэ 90% оҥоһулунна диэн этэллэр.

Ол да эрээри Анапаҕа сайыҥҥы сынньалаҥын атаараары эрдэттэн бронь ылыы былырыыҥҥы кэми кытта холоотоххо 40%-тан 80%-ҥа диэри түһэн турар. Наадыйыы ордук бассейна уонна сайдыылаах инфраструктурата суох дьоҕус чэпчэки сыаналаах отелларга, ыалдьыттатар дьиэлэргэ уонна пансионнарга түспүт.

Ону кытта Арассыыйа туриндустриятын сойууһа (РСТ) “все включено” сегменнээх отелларга наадыйыы төттөрүтүн үс гыммыт бииринэн улааппытын бэлиэтиир.