Анастасия Гуляева: «Байыастарбыт биһигини биир сомоҕо оҥордулар, түмтүлэр»

Хаҥалас улууһун Нөмүгү нэһилиэгин дьокутаата, «Кэрэл» дьахталлар түмсүүлэрин салайааччыта Анастасия Николаевна Гуляева байыаннай эпэрээссийэҕэ кытта сылдьар оҕолорбут биһигини биир сомоҕо оҥордулар, түмтүлэр, онон нэһилиэкпит сайдарыгар салгыы икки бырайыагынан үлэлии сылдьабыт диэн кэпсээтэ.

— Нөмүгү нэһилиэгиттэн 16 эдэр ыччат быстах ыҥырыынан, 6 уол баҕа өттүнэн байыаннай эпэрээссийэҕэ барбыттара. Бу дьоммутуттан байыаннай дьайыылар бэтэрээннэрэ, баҕа өттүнэн байыаннай сулууспаҕа барбыт, биһиги дьиэ кэргэҥҥэ күтүөт И.И.Михайлов дьоруойдуу охтубута. Киниэхэ «Хорсунун иһин» наҕараадатын кэргэнигэр А.Б.Михайловаҕа туттарбыттара. Бу кэнниттэн тус бэйэбэр күүстээх санаа киирбитэ –  манна тыылга олорон оҕолорбутугар хайаан да көмөлөстөхпүтүнэ табыллар диэн.

Халлаан тымныйан эрэр диэн, алтынньыттан ыла, сылаас таҥас хомуйан саҕалаабыппыт. Бастаан аҕыйах киһи кыттыбыта. Ол да буоллар биир куулу хомуйан ыыппыппыт. Кэлин син өйдөөн элбээн испиппит. Онон 100 амарах сүрэхтээх, аһыныгас санаалаах ийэлэр биир түмсүү буолбуппут. Сэттэ төгүл баһыылка оҥорон ыыппыппыт. Элбэх наскы баайыллыбыта, балаклава, кээнчэ, олорор олбох тигиллибитэ, харчы хомуллубута. Улуус дьаһалтата Нөмүгү нэһилиэгин ийэлэрэ элбэх үлэни ыыппыппытын учуоттаан, 50 тыһыынча суумаҕа флис таҥас ылан биэрэн, онон ичигэс ис таҥас тигэн ыыппыппыт. Нэһилиэкпит эбэлэрэ, ийэлэрэ барахсаттар буойун оҕолорбутугар наадалаах таҥас тигэн аҕала тураллар.
Ону таһынан дьиэ тутта сылдьан хомуурга хабыллан сулууспалыы барбыт М.И.Кириллин дьиэ кэргэнигэр көмө оҥорон үөрдүбүппүт. Байыастарбыт дьиэ кэргэттэригэр муус ылыытыгар сылаас эбиэт бэлэмнээн көмө буолбуппут.

Ахсынньыга Чита куорат пуордуттан икки баттыктаах саха уолун кытта көтөн кэлбитим. Дьокуускай куорат олохтооҕо Альберт Р. этэ. Кэлэн баран, түргэнник үтүөрдүн диэн, бэйэ олохтоох аһыттан хомуйа охсон киллэрэн биэрбиппит. Аҕа түмсүүтүттэн кыттыһан, кус, балык биэрбиттэрэ. Оҕобут онон түргэнник үтүөрэн, байыаннай эпэрээссийэҕэ төннүбүтэ. Барарыгар эмиэ сылаас таҥас, ыалдьар атаҕар кээнчэ уонна бэйэтигэр харысхал ылан, үөрүүтэ улахан этэ. Үлэбитин М.Емельяновалыын, С.Диодоровалыын сүбэлэһэн наадалааҕы, туһалааҕы оҥоро сатыыбыт.

Нөмүгүгэ сэтинньи ыйга биир сомоҕо буолууга, патриотическай иитиигэ “Бары бииргэ!” диэн слет ыытыллыбыта. Онно И.И.Михайлов кэриэһигэр уоннуу киһилээх алта хамаанда кэлэн кыттыбыта. Ити курдук байыаннай эпэрээссийэҕэ сылдьар оҕолорбут биһигини биир сомоҕо оҥордулар, түмтүлэр. Онон түмсэммит нэһилиэкпит сайдарыгар икки бырайыагынан үлэлии сылдьабыт. Бастакы бырайыагынан оноолоох сахалыы сону 25 буолан тигэн саҕалаабыппыт. Икки бырайыак – быйыл нэһилиэкпитигэр Аҕалар сыллара биллэриллибитэ. Онон сүүс эр киһи кыттыылаах хору сайын ыһыахха бэлэмниири былаанныыбыт, онно 17 үйэ сонун тигэн биэриэ этигит дуо диэбиттэрин, тигэн бүтэрэн, тиэрдэ сылдьабыт.
Маннык уустук кэмҥэ эр дьоммут дьоһун суолталарын өрө тутан, биир сомоҕо, модун санаалаах эрэллээх эркин буолалларыгар күүс-көмө буоларбытынан киэн туттабыт уонна алгыспытын аныыбыт!