Анастасия Варламова аатын үйэтитии күрэһэ

Бу өрөбүллэргэ Мэҥэ Хаҥалас улууһун Бастакы Баатара нэһилиэгэр биллиилээх ырыаһыт, мелодист, СӨ норуодунай артыыһа, СӨ култууратын үтүөлээх үлэһитэ Анастасия Николаевна Варламова-Эдьиий Настаа төрөөбүтэ 75 сылыгар аналлаах, биирдиилээн толорооччуларга «Төннө туруоҕум алааспар» өрөспүүбүлүкэтээҕи аһаҕас ырыа күөн күрэһэ ыытылынна.

Амма, Чурапчы, Орто Халыма улуустарыттан, Дьокуускай куораттан, Мэҥэ Хаҥаластан Мэлдьэхси, Дьаҥхаады, Бастакы Наахара, Хара, Бастакы Тыыллыма, Хорообут, Баатара, Бастакы Баатара, Төҥүлү, Доллу, Тараҕай, Бүтэйдээх нэһилиэктэриттэн уопсайа 27 кыттааччы Анастасия Николаевна репертуарыттан уостан түспэт ырыалары уонна бэйэлэрэ ордук табыллан аһыллар ырыаларын толордулар.

Дьүүллүүр сүбэҕэ бэрэссэдээтэлинэн СӨ үтүөлээх артыыһа, СӨ ырыа айааччыларын сойууһун салайааччыта, композитор, култуура уонна вокальнай искусство диэйэтэлэ Алексей Егоров, СӨ култууратын үтүөлээх үлэһитэ, М.К. Попова-Эдьиий Марыына аатынан оҕо ускуустубатын оскуолатын дириэктэрэ, норуодунай оркестр салайааччы дирижерэ Василий Захаров, СӨ култууратын үтүөлээх үлэһитэ, Д.Ходулов аатынан норуот айымньытын дьиэтин исписэлииһэ Сардана Осипова, СӨ култууратын туйгуна, култуура уонна духуобунай сайдыы салалтатын методическай салаатын салайааччыта, улуустааҕы култуура үлэһиттэрин биир идэлээхтэрин сойууһун бэрэссэдээтэлэ Эмма Павлова, Анастасия Варламова аймаҕа Матрена Филиппова үлэлээтилэр.

Бырайыак ааптара, Бэдьимэ култуура киинин дириэктэринэн үлэлээбит, Алексей Ходулов маннык күөн күрэһи аан бастаан 2018 сыллаахха Анастасия Варламова төрөөбүтэ 70 сылыгар ыччаттарга диэн тэрийбиттэрин, онтон быйыл үһүс төгүлүн ыытылларын уонна сааһынан хааччаҕа суох аһаҕас оҥорбуттарын иһитиннэрдэ.

«Төннө туруоҕум алааспар» ырыа күрэһэ ыччаттарга уонна 36 сааһыттан үөһээ саастаах кыттааччылар диэн араарыллан сыаналанна. I, II, III истиэпэннээх дипломаны, I, II, III истиэпэннээх лауреаттары таллылар. Оттон Кылаан кыайыылааҕынан Мэҥэ Хайалас улууһун Дьаҥхаады нэһилиэгиттэн Айыына Харабаева буолла. Кини Норуот айымньытын уокуруктааҕы киинигэр хор учууталынан үлэлиир.

Ону таһынан, анал ааттар хаһаайыннарынан: «Бастыҥ доҕуһуол» Георгий Попов, «Кэскиллээх ырыаһыт» Сарыал Сивцев (Чурапчы), «Кэрэ куолас» Елена Чемезова (Бастакы Баатара), «Бэриниилээх ырыаһыт» Роман Романов (Мэлдьэхси), «Кэрэхсэбиллээх ырыаһыт» Анна Борисова (Сыымах), «Дьикти дьүһүйүү» Анатолий Гуляев (Орто Халыма) буоллулар.

Ытык киһибит Анастасия Варламова үтүө аатыгар анаммыт күөн күрэс, ырыаҕа хоһуйуллубут көмүс күһүн ыытыллан, олус истиҥ-иһирэх айар үлэтин сырдатар дьоро киэһэнэн түмүктэннэ диэн Мэҥэ Хаҥалас улууһун дьаһалтатын пресс-сулууспата иһитиннэрэр.