Анатолий Николаев: «Анал этиигэ турбут соруктары олоххо киллэрэргэ күүскэ үлэлиэхпит»

Ил Дархан быйылгы Анал этиитигэр үөрэхтээһин, иитии хайысхата эмиэ биир сүрүн миэстэни ылла. Балтараа чаастаах этиигэ үөрэхтээһин, каадыры бэлэмнээһин, үлэнэн хааччыйыы, о.д.а. итиннэ сыһыаннаах боппуруостар сиһилии ырытылыннылар.

Анал этиигэ үөрэхтээһин эйгэтигэр туруоруллубут соруктар тустарынан норуот дьокутаата, Хотугулуу-Илиҥҥи федеральнай университет ректора Анатолий Николаев санаатын үллэһиннэ:

— Ил Дархаммыт норуот дьокутааттарыгар, Бырабыыталыстыбаҕа уонна уопсастыбаннаска туһаайбыт быйылгы Анал этиитигэр буола турар быһыыны-майгыны киэҥник ырытта уонна эһиилги, онтон кэлэр сыллары хабан өрөспүүбүлүкэ иннигэр турар соруктары, былааннары сиһилии кэпсээтэ.

Мин норуот дьокутаата уонна Хотугулуу-Илиҥҥи федеральнай университет ректора буоларым быһыытынан, сиһилии иһиттим уонна хас да хайысхаҕа үлэ соругун ылынным. Бииринэн ылан көрдөххө, биһиэхэ үөрэхтээһин өттүн күүһүрдэргэ эттэ. Тоҕо диэтэххэ, билигин федеральнай киин уонна Өрөспүүбүлүкэ Бырабыыталыстыбата оскуолаларга улахан болҕомтону уурдулар. Элбэх саҥа оскуола үлэҕэ киирдэ, үөрэх тэрилтэлэригэр өрөмүөн оҥоһулунна, салгыы өссө үлэ күүскэ барара, итини таһынан тус сыаллаах көмөлөр оҥоһуллаллара этилиннэ. Оскуолаҕа үлэлии сылдьар педагогтарга эмиэ анал истипиэндьийэ быһыытынан харчынан көмө оҥоһуллара ыйылынна.

Иккиһинэн, биһиги федеральнай университет буоларбыт быһыытынан, чуолаан, бырамыысыланнаска каадырдары бэлэмниир сорук турда. Бу Анал этии хас биирдии хайысхатынан көрөн, университеппыт үлэтин эһиилги былааныгар көннөрүүлэри, эбиилэри киллэрэн бигэргэтиэхпит. Ил Дархаммыт ыйыыларын олоххо киллэрэргэ күүскэ үлэлиэхпит.