Анатолий Николаев: «Бу мунньах биэс сыл үлэлиир былааны торумнуур саамай туһааннаах, суолталаах буолуоҕа»

Сэттис ыҥырыылаах Ил Түмэҥҥэ норуот дьокутаатынан талыллыбыт Анатолий Николаев бастакы күн түмүгүнэн санаатын үллэстэр:

— Ил Түмэн бастакы пленарнай мунньаҕын үлэтин түмүктээтэ. Ил Түмэн састаабын, салалтатын таллыбыт. Ол курдук, Алексей Еремееви сэттис ыҥырыылаах Ил Түмэн бэрэссэдээтэлинэн, Александр Жиркову бэрэссэдээтэли бастакы солбуйааччынан таллыбыт. Өссө үс солбуйааччыны – Юрий Николаевы, Афанасий Владимировы уонна Александр Подголовы таллыбыт. Бу мунньах биэс сыл үлэлиир былааны торумнуур саамай туһааннаах, суолталаах буолуоҕа дии саныыбын. Тоҕо диэтэххэ, сарсын сис кэмитиэттэри кимнээх салайаллара биллиэ, чилиэннэр талыллыахтара.

Мин санаабар, «Биир ньыгыл Арассыыйа» баартыйаттан талыллыбыт дьокутааттар баай уопуттаах, күүскэ үлэлиир кыахтаах дьон киирбиттэр. Онон Ил Дархан Айсен Николаевы уонна Бырабыыталыстыбаны кытары ыкса үлэлиэхтэрэ дии саныыбын.

Оттон миэхэ куоластарын биэрбит быыбардааччыларбар улахан махталбын тиэрдэбин. Итини таһынан иккис болдьоххо талыллан үлэлиир дьокутааттарга ситиһиини баҕарабын. Бүгүҥҥү күн миэхэ эмиэ ураты буолар, тоҕо диэтэххэ, ааспыт болдьоххо ортотуттан киирэн дьокутааттаабытым. Инньэ гынан Ил Түмэн саҥа ыҥырыытыгар салалтаны хайдах талалларын билбэт этим, бүгүн көрөн интэриэһиргээтим. Ол да буоллар, ааспыт ыҥырыыга үлэлээммин уопут син баар дии саныыбын. Быйыл байыаннай дьайыы боппуруостарынан дьарыктанар өссө биир кэмитиэт тэриллиэҕэ диэн буолла, онно биһиги хандьыдааттары көрө, быһаара сылдьабыт. Сарсыҥҥы Ил Түмэн мунньаҕар барыта биллиэҕэ, сис кэмитиэттэр састааптара талыллан, бигэргэниэхтэрэ.