Андрей Артамонов: “Аны сайын «Бөртө оһуохайа» бэстибээли тэрийиэхпит»

Олунньу 7-8 күннэригэр Хаҥалас улууһун 2-с Малдьаҕар нэһилиэгэр Улахан Ааҥҥа «Бөртө Оһуохайа» ыытыллан, улахан сэҥээриини ылла.

Өрөспүүбүлүкэтээҕи тэрээһини Хаҥалас улууһун култуураҕа салаата, 2-с Малдьаҕар нэһилиэгин дьаһалтата, тэрилтэлэрэ, Норуот айымньытын улуустааҕы киинэ, өрөспүүбүлүкэтээҕи “Оһуохай” түмсүү кыттыгастаах, 2-с Малдьаҕар олохтооҕо,   оҕолорго «Саха Боотур» байыаннай-спортивнай бэлэмнэнии уонна патриотическай иитии киинин салайааччыта Андрей Артамонов уонна “Күн дьоно” фольклор бөлөҕүн салайааччыта Евдокия Ивановна Кондратьева-Далбар Кылыһах көҕүлээһиннэринэн тэрилиннэ.

Тэрээһин икки күн ньиргиччи үрдүк таһымнаахтык ыытыллан, Мэҥэ Хаҥаластан, Тааттаттан, Ньурбаттан, Намтан, Хаҥаластан, Дьокуускайтан кэлбит этээччилэр сөрү диэн сөҕөн, астынан тарҕастылар. Дьүүллүүр сүбэҕэ Дьокуускайтан, улуустартан тиийэ айаннаан кэлэн үлэлээтилэр.

«Саха Боотур» киин салайааччыта, байыаннай дьайыы кыттыылааҕа Андрей Артамонов этэринэн, эдэр боотурдарга Сүр көтөҕөр оһуохай баар. Аныгы Саха Боотура барытыгар сатабыллаах. Кини булчут, сылгыһыт, сайын оттуур, кыһын мас мастыыр. Олордо да олоҥхолуур, турда да оһуохайдыыр бары өттүнэн сайдыылаах эр бэрдэ.

— Биһиги Хаҥалас улууһун Улахан Аан сэлиэнньэтин Ампаардаах алааһыгар бастакы оҕо-ыччат байыаннай-спортивнай уонна патриотическай сүлүөтүн 4 хонук устата ыыппыт уопуттаахпыт. Арассыыйаҕа Норуоттар сомоҕолоһууларын, Саха сиригэр Култуура сылларынан «Бөртө Оһуохайын» ыытар туһунан этиибитин култуура улуустааҕы салаатыгар киллэрэн, өйөбүлү ылан, “Бөртө Оһуохайа” өрөспүүбүлүкэ таһымыгар ааста.

Сүрүн бириискэ бүтүн убаһаны туруораммыт, оһуохай бары кыттыылаахтара, Дархан этээччилэр сөҕөн-махтайан, махтанан бардылар. Мантан эрдийэммит, оһуохайы оройуттан тутан, ыччаппытыгар сахалыы тыыны уһугуннарар сорук туруорунабыт. Онон  быйыл сайын Ампаардаах алааһыгар «Бөртө Оһуохайын» бэстибээлин ыытар туһунан “Арчы” духуобунай киини кытары сөбүлэһии түһэристибит, — диэн көҕүлээччи, тэрийсээччи Андрей Артамонов «Бөртө Оһуохайа» өссө да инники кэскиллээҕин туһунан кэпсээтэ.