Андрей Федотов “Барс-2” этэрээт байыастарын кытта көрүстэ

Хантараактара бүтэн байыаннай эпэрээссийэттэн дьиэлэригэр төннөн эрэр “Барс-2” этэрээт байыаннай сулууспалаахтарын кытта Арассыыйа Бэрэсидьиэнин иһинэн Саха сирин Бастайааннай бэрэстэбиитэлистибэтигэр көрсүһүү буолла, диэн өрөспүүбүлүкэ Биир кэлим сүрүннүүр киинэ иһитиннэрдэ.

Биэс аҥаар  ый устата баҕа өттүнэн сулууспалааччылар хамандыырдарын Василий Егоров салалтатынан сулууспалаатылар. Өрөспүүбүлүкэҕэ биллэр спортсмен, кикбоксиҥҥа РФ үтүөлээх тириэньэрэ, өрөспүүбүлүкэ физическэй култуураҕа уонна успуорка үтүөлээх үлэһитэ, спортивнай эрэли бэлэмниир өрөспүүбүлүкэтээҕи киин дириэктэрэ байыананй дьайыыга баҕа өттүнэн баран, батальону хамаандалааһыны бэйэтигэр ылыммыта.

“Бойобуой киирсии линиятыгар биэс аҥаар ый сылдьыы – бу олус судургута суох кэм уонна ытыктабылы эрэйэр”, — диэтэ Арассыыйа Бэрэсидьиэнин иһинэн СӨ Бастайааннай бэрэстэбиитэлэ,  сүрүннүүр киин бэрэссэдээтэлэ Андрей Федотов. – Өрөспүүбүлүкэ эһиги күүстээх санааҕытынан, биһиги тутулуга суох уонна көҥүл буоларбыт туһугар Аҕа дойдуну көмүскүүргэ бэлэмҥитинэн киэн туттар. Бүгүн байыаннай дьайыы бара турар сиригэр саҥа көлүөнэ дьоруойдар тахсаллар, инникитин хайдах тутуллаах дойдуга олорорбут онтон тутулуктаах. Онон бу саалаҕа кинилэртэн сорохторун кытта көрсөбүт”.

Василий Егоров уонна атын байыастар Саха сирин салалтатыгар, РФ Бэрэсидьиэнин иһинэн СӨ Бастайааннай бэрэстэбиитэлистибэтин Байыаннай сулууспалаахтары өйүүр биир кэлим киин үлэһиттэригэр ыытар улахан үлэлэрин иһин махтаннылар, маныаха биир дойдулаахтарын уонна эрэгиийэн баһылыгын Айсен Николаев тус оруолун бэлиэтээтилэр.

“Эбии тиэхиньикэни уонна сэби-сэбиргэли тиэрдэн, Саха артыыстарын кэнсиэртэринэн, дойдубутуттан суруктарынан өйөөһүн биһиэхэ күүһү-уоҕу эппитэ”, — диэтэ Василий Егоров. Саха сирэ үтүмэн үлэни оҥорор. Маннык тиһиги биир да эрэгийиэн олохтуу илик диэн эрэллээхтик этэбин. Биһигини болҕомтоҕо туталларын билэбит. Ол туһунан биһиэхэ этэрээккэ өрөспүүбүлүкэ Ил Дархана, Москваҕа Саха сирин бэрэстэбиитэлэ уонна атын биир дойдулаахтарбыт кэлиилэрэ туоһулуур.

Билигин байыастар доруобуйаларын чөлүгэр түһэрэн, “Бэс чагда” сонотуоруйга эмтэнэллэр, ол кэнниттэн төрөөбүт дойдуларыгар айанныахтара.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.