Андрей Григорьев-Тута «Аҕа дойдуну көмүскээччилэр» пуонда филиалыгар ыалдьыттаата

Арассыыйа Дьоруойа Андрей Григорьев-Тута бэҕэһээ, муус устар 11 күнүгэр, «Аҕа дойдуну көмүскээччилэр» пуонда Саха сиринээҕи филиалыгар ыалдьыттаата.

Кини филиал үлэтин-хамнаһын кытта билистэ. Дьоруойу филиал салайааччыта Алексей Александров арыаллаата. Дьоруойга байыаннай дьайыы кыттыылаахтарын устуоруйаларын үһүс хомуурунньуктарын «Честь наивысшая — носить русский мундир» бэлэхтээтилэр. Бу хомуурунньук тохсунньу ыйга «Аҕа дойдуну көмүскээччилэр» пуонда көҕүлээһиниэн тахсыбыта.

Андрей Григорьев кэлэктиипкэ махтанна:

— Пуонда үлэтин-хамнаһын бэркэ билэбин. Ньурба улууһун социальнай координатора Александра Николаева миэхэ уонна дьиэ кэргэммэр көмө бөҕөтүн оҥорбута. Байыаннай дьайыыга да сылдьан мин пуонда, биир дойдулаахтарым өйөбүллэрин билэрим. Онон улахан махталбын тиэрдэбин!