Андрей Находкин: «Сылгыһыт күрэҕэр ким ордук бэлэмнээх, дьулуурдаах хамаанда — ол кыайдын!»

Ил Түмэн тыа сиригэр уонна аграрнай бэлиитикэҕэ сис кэмитиэтин, тус бэйэм ааппыттан сылгыһыт үлэтин олоххут аргыһа оҥостубут тыа хаһаайыстыбатын бэтэрээннэрин, билигин үлэлии-хамныы сылдьар сылгыһыттары бэлиэ күҥҥүтүнэн итиитик-истиҥник эҕэрдэлиибин!

Дьөһөгөй Айыы оҕото, түөрт түөрэм туйахтаах, сыспай сиэллээх сылгыбыт барахсан саханы саха дэттэҕэ. Сылгыһыт диэн саха норуотугар түҥ былыргыттан илдьэ кэлбит ууһу, отоһуту кытта тэҥҥэ тутуллар идэбит. Дьөһөгөй куттаах эрэ киһи сылгыга сыстаҕас, сылгыһыт буолар. Сылгы — саха норуотун символа, киэҥ-нэлэмэн тыйыс дойдуну баһылаан-көһүлээн олоруу, тулуурдаах буолуу холобура. Уйгу-быйаҥ Ыһыахпытын Дьөһөгөй Айыыттан көрдөһөөрү ыһабыт, алгыспытын аныыбыт.

Тыа хаһаайыстыбатыгар киэн туттар дьоммут — Социалистическай Үлэ 23 дьоруойа, олортон алта бастакы дьоруойбут бары сылгыһыт буолаллара да элбэҕи этэр.

Эһиги уустук, сындааһыннаах үлэҕит олус суолталааҕын хас биирдии нэһилиэк олохтооҕо өйдүүр. Төрүт үгэстэрбит сылгы иитиитин кытта ыкса ситимнээхтэрин таһынан, иҥэмтэлээх бэйэбит эппит, илгэлээх кымыспыт сылгыбытыгар эрэ баар.

Ил Түмэн сылгы, сир туһунан сокуоннарга кэккэ уларытыылары киллэрдэ: сылгы хаһан аһыыр, мэччийэр төрүт ыырын туһунан, үгэстэри тутуһан сылгыны буойуната суох өлөрөр туһунан. Итини таһынан биэ баһыгар бэриллэр үп 3 тыһыынчаттан 5 тыһыынчаҕа диэри улаатта, итиннэ өрөспүүбүлүкэ бүддьүөтүттэн 331 мөл. солк. барыаҕа. Сылгы баазаларын тутууга, племенной үлэҕэ, эт тутуутугар, о.д.а. кэскиллээх хайысхаларбытыгар үбүлээһин, өйөбүл оҥоһуллар.

Бу күннэргэ улуус-улуус аайы сылгыһыт күрэхтэрэ, кэскиллээх кэпсэтии түһүлгэлэрэ тэрилиннилэр, түмүк дьаһал бүгүн, кулун тутар 21 күнүгэр, Сылгыһыт күнүгэр Амма улууһугар ыытыллыа.

Сылгыны үөрдээн иитиигэ эппиккит-туруорсубуккут олоххо киирэ турдун, онтон сылгыһыт күрэҕэр ким ордук бэлэмнээх, дьулуурдаах хамаанда — ол кыайдын!

Тус олоххутугар, үлэҕитигэр этэҥҥэ буолууну!

Истиҥ эҕэрдэни кытта, Андрей Находкин.