Андрей Находкин тыа хаһаайыстыбатын кооперативтарын сийиэһигэр кытынна

Ил Түмэн тыа сирин уонна аграрнай бэлиитикэтигэр сис кэмитиэтин бэрэссэдээтэлэ Андрей Находкин тохсунньу 25-27 күннэригэр ыытыллыбыт «Кооперациялары сөргүтүү уон пуорума: уопут, ситиһии, инники сайдыыта» Х Бүтүн Арассыыйатааҕы тыа хаһаайыстыбатын кооперативтарын сийиэһигэр кытынна.

Сийиэһи иилээн-саҕалаан Федерация Сэбиэтин аграрнай-продовольственнай бэлиитикэ уонна айылҕа баайын туһаныы кэмитиэтин бэрэссэдээтэлин солбуйааччы Егор Борисов ыытта.

Сийиэскэ тыа хаһаайыстыбатын оҥорон таһаарыытын уонна потребительскай кооперативтар, кооперациялар, фермердэр, АПК сайдыытын институтун бэрэстэбиитэллэрэ, Арассыыйа 79 субъегыттан барыта 379 киһи кытынна.

Федерация Сэбиэтин аграрнай-продовольственнай бэлиитикэ уонна айылҕа баайын туһаныы кэмитиэтин бэрэссэдээтэлэ Александр Двойных тыа хаһаайыстыбатын кооперацията тыа хаһаайыстыбатын аччыгый уонна орто оҥорон таһаарааччыларын сайдыыларын института, тыа сиригэр хаһаайыстыба тирэхтээх сайдыытын олуга буолар диэн бэлиэтээтэ.
«Арассыыйа тыатын хаһаайыстыбатын министиэристибэтэ, сайдыы институттара, эрэгийиэннээҕи былаас уорганнара ылыммыт кэлим дьаһалларынан ааспыт үс сылга тыа хаһаайыстыбатын потребительскай кооперативтарын ахсаана 700-н тахсата улаатта», — диэтэ Александр Двойных.

Ол гынан баран, судаарыстыба өттүттэн өйөбүл аадырыстаан оҥоһулларын, табаары оҥорон таһаарааччылар бу эрэ категорияларыгар бэриллэрин бэлиэтээн эттэ. «Тыа хаһаайыстыбатын кооперацията тыа сирин олохтоохторун дьарыктыыр социальнай хайысхалааҕын учуоттуохха наада. Тыа сиригэр соҕотуопкалааһыҥҥа уонна оҥорон таһаарыыга чэпчэтиини көрүү саҥа үлэ миэстэтин таһаарыа, саҥа, хаачыстыбалаах бородууксуйа көрүҥнэрэ, нолуок баазата үрдүүрүгэр кыаҕы биэриэ, ол барыта дэриэбинэ олоҕун таһымын уонна хаачыстыбатын үрдэтиэ», — диэн эттэ Александр Двойных.

Онтон Федерация Сэбиэтин кэмитиэтин бэрэссэдээтэлин солбуйааччы Егор Борисов: «Кооперация батарыы, астааһын, бородууксуйаны харайыы, тэхэниичэскэй, ветеринарйнай, зоотехнологическай уонна үп өҥөтүн, кыһалҕатын эрэ быһаарбакка, дьарыктаах буолуу, нэһилиэнньэ олоҕун таһымын үрдэтии курдук улахан социальнай соругу эмиэ толоруохтаах», — диэтэ.

Ил Түмэн тыа сирин уонна аграрнай бэлиитикэтигэр сис кэмитиэтин бэрэссэдээтэлэ Андрей Находкин эппитинэн, сийиэс түмүгүнэн тыа хаһаайыстыбатын кооперацияларын сайыннарар федеральнай бырагыраама оҥоһуллара, коопертивнай инфраструктураны үбүлээһини улаатыннарыы, иккис таһымнаах кооперативтары тэрийии, кирэдиит уонна оҥорон таһаарыы кооперативтарын, холбоһуктары өйүүр аналлах тэрилтэ наадатын ыйдылар.