Ньурба улууһун култуураҕа департаменын хаартыската
Сахалар тумус туттар дьоммутунан баайбыт. Бу күннэргэ Ньурбаҕа Андрей Саввич Борисов ытык ыалдьыт буолан, дьон-норуот өйүгэр өй, санаатыгар санаа, кыаҕыгар кыах эбэн, кынаттаан барда.
Андрей Саввич өркөн өйүнэн, инникини өтө көрөр бөлөһүөк санаатынан салайтаран, өрөспүүбүлүкэбитигэр «Геокултуурунай сайдыы» үнүстүүтүн тэрийэн, саха дьонун биир санааҕа түмэн үлэлэтэр толкуйу тобула сылдьар киэн туттар тыыннаах номохпут буолар диэн бары билэбит. Эспэдииссийэ бу сырыытыгар кини Ил Дархан Айсен Сергеевич сорудаҕынан Олоҥхо дьиэлэрин сүрүннүүр үлэ тула кэпсэтиини төрүттээтэ. Андрей Саввич түмүү, түмсүү тула элбэх санааны, элбэх толкуйу киллэрдэ. Олоҥхо дьиэтэ түмэр күүһүн, олоҥхоҕо итэҕэл, алгыс, арчы, күн күүһүн иҥэринэр оһуокайбыт барыта түмүллэн, биир санааҕа киллэрэр күүһэ тирэхтээх буолуутун күүскэ бэлиэтээтэ.
Ньурба улууһугар култуурабыт сайдыыта ааҕар балаҕантан саҕалаан, ускуустуба чыпчаалыгар тиийиитин кини улууска сылдьыбыт икки күнүгэр бэлиэтээтэ. Кини саҥа үрдэлгэ үктэнэр кэммитигэр итэҕэли өйдүүргэ Олоҥхо дьиэтин тутан, сүрүн күүһү онно ууран үлэлииргэ, төрүт култуураны тарҕатарга, олохтоох омук укулаатын ыспакка түмэр толкуйу тобуларга ыйан-кэрдэн, сүбэ-соргу биэрэн, култуура үлэһиттэригэр, бары истээччилэргэ тус санааларын толору тириэртэ. Андрей Саввич сахалар түмсүүлээх эрэ буоллахпытына, омук быһыытынан үрдүк чыпчааллары дабайар кыахтаахпытын, түмэр тыл суолтата дириҥин, хорутуулааҕын өйдөтөр, тэрийэр үлэтэ үтүө түмүктэри аҕалара саарбаҕа суох.
Санатан эттэххэ, быйыл Саха Өрөспүүбүлүкэтигэр Олоҥхо дьиэлэрин айар бырайыактарыгар уонна тиэхиньиичэскэй өрүттэрэ сайдыытыгар көмө харчы көрүлүннэ. Онон, бу үлэ барыта кэмигэр буола турар уонна саҥа үрдэли дабайарга олук буолар.
Ньурба дьоно-сэргэтэ ытыктыыр киһибитигэр Андрей Саввичка уонна биир санаанан үлэлэһэ сылдьар эспэдииссийэ хамаандатыгар махтанабыт, өссө да бииргэ үлэлэһэн, туруорбут сыалбытын-сорукпутун ситиһиэхпит диэн эрэнэбит. Норуот баайа — Олоҥхоҕо, Олоҥхо күүһэ — норуокка!
Розалия ТИХОНОВА, Ньурба оройуонун Култуураҕа департаменын салайааччыта
Департамент хаартыскалара
Тымныыттан эчэйии үксэ арыгы иһииттэн тахсар диэн Өрөспүүбүлүкэтээҕи 2 №-дээх балыыһатын - Суһал мэдиссиинэ көмөтүн…
Тэрээһиннэргэ байыаннай дьайыы бэтэрээннэрэ уонна кыргыһыы хонуутугар охтубут дьон дьиэ кэргэттэрин чилиэннэрэ, барыта 28 тыһыынчаттан…
Кэнники кэмҥэ оҕо аахпат буолбутун бары билинэбит. Аахпат оҕо билиитэ-көрүүтэ татым, суруйарыгар да сыыһалардаах буолар.…
Ил Дархан Айсен Николаев “Саха сирин тимир суоллара” хампаанньа 2025 сыллааҕы үбүн-хаһаайыстыбаннай үлэтин барыллаан түмүктэрин…
Ааспыт суукка иһигэр Дьокуускай куоракка биэс суол быһылаана таҕыста. Бу туһунан ГАИ пресс-сулууспата иһитиннэрэр. Туманнаах,…
РФ Бэрэсидьиэнин наҕараадалааһын туһунан дьаһала Үлэҕэ ситиһиилэрин уонна уһун сыллаах үлэлэрин иһин РФ Бэрэсидьиэнин Махтала…