Хаартыска sakha.gov.ru ылылынна
Ытык кырдьаҕас Анисия Гаврильевна Габышева 100 сааһын туолла. Бу долгутуулаах бэлиэ күн кинини Арассыыйа Бэрэсидьиэнэ Владимир Путин уонна СӨ Ил Дархана Айсен Николаев эҕэрдэлээтилэр.
СӨ Бырабыыталыстыбатын бэрэссэдээтэлин солбуйааччы Георгий Степанов Ил Дархан аатыттан «Үйэ саас» бочуоттаах бэлиэни туттарда.
«Биһиги өрөспүүбүлүкэбитигэр сүүс саастарын туолбут 13 ытык кырдьаҕас баар. Маны сэргэ, бэлиэтээн эттэхпинэ, 80 саастарын туолааччылар ахсааннара сыл ахсын элбээн иһэр. Бу биһиэхэ доруобуйа харыстабылыгар болҕомто улаатан, мэдиссиинэ сайдан, социальнай хааччыллыы таһыма үрдээн иһэрин көрдөрөр. Билигин судаарыстыба өттүттэн дьон-сэргэ дэлэгэй олохтоох, чэгиэн уонна дьоллоох буоларыгар, уһуннук олороругар сыал-сорук туруоруллар, болҕомто ууруллар. Анисия Гаврильевна биһиэхэ барыбытыгар үтүө холобур буолар», — диэн этэр Георгий Степанов.
Вице-премьер Анисия Гаврильевна Аҕа дойду уоттаах сэриитин ыарахан сылларыгар, сэрии кэнниттэн дойдуга уустук кэмҥэ ыарахантан чаҕыйбакка, самныбакка төрөөбүт сирин-уотун социальнай-экэнэмиичэскэй сайдыытыгар бэйэтин кылаатын киллэрсибитин, кини ол кэмнээҕи хорсун-хоодуот санаалаах көлүөнэ бэрэстэбиитэлэ буоларын бэлиэтээтэ.
Анисия Гаврильевна дьону-сэргэни кытта үчүгэй, истиҥ сыһыаннаах буолуу, сөптөөх хамсаныы уонна иҥэмтиэлээх, сибиэһэй аһылык киһи үйэтэ уһууругар тирэх буолалларын этэр. «Үтүө санаалаах, эйэҕэс майгылаах, элбэхтик хамсанар, иҥэмтиэлээх сибиэһэй аһынан аһыыр киһи уһуннук олорор. Мин хас сарсыарда аайы сэрээккэлиибин, күммүн эмиэ сөптөөх хамсаныынан-имсэниинэн түмүктүүбүн. Чэгиэнник сылдьар, үчүгэйдик өйдүүр, толкуйдуур буолар туһуттан, хоһоон, ырыа үөрэтэбин, кинигэни доргуччу ааҕабын. Чөл, чэгиэн олоҕу тутуһабын«, — диир ытык кырдьаҕас.
Анисия Гаврильевна Чурапчы улууһугар Кытаанахха төрөөбүт. Кытаанах сэттэ кылаастаах оскуолатын туйгун сыананан бүтэрэн баран, Чурапчыга педагогическай училищеҕа үөрэнэ киирбит. Үөрэҕин ситиһиилээхтик бүтэрбит, алын сүһүөх кылаас учуутала буолбут. Улуу Кыайыы күнүн Одьулууҥҥа көрсүбүт.
Кини 1947 сыллаахха фронтовик Габышев Георгий Романовичка кэргэн тахсыбыт. Иллээх дьиэ кэргэн биэс оҕоломмут. Кинилэр Дириҥҥэ көһөн дьиэ-уот туттубуттар. Оҕолоро оскуолаҕа онно үөрэммиттэр, успуордунан дьарыктаммыттар. Ийэлээх аҕа ылбыт идэлэринэн үлэлээбиттэр.
Манна даҕатан эттэххэ, улахан ааттаах-суоллаах худуоһунньук Афанасий Мунхалов, балерина Наталья Посельская, култуура уонна ускуустуба диэйэтэлэ Афанасий Аммосов, уо.д.а. Анисия Гаврильевна үөрэппит оҕолорунан буолаллар.
Анисия Гаврильевна нэһилиэк дьокутаатынан хас да төгүл талыллыбыта, дьахталлар кэмитиэттэрин бэрэссэдээтэлинэн ситиһиилээхтик үлэлээбитэ. Кини 95 сааһыгар «Золотое мгновение» өрөспүүбүлүкэтээҕи бэстибээлгэ Гран-при ылан турар. Сыл ахсын 3 №-дээх оскуола үөрэнээччилэрин, Дьокуускайдааҕы мэдиссиинэ кэллиэһин устудьуоннарын кытары көрсөрө. Уһун үйэлээхтэр тустарынан 2023 сыллаахха күн сирин көрбүт өрөспүүбүлүкэ кинигэтигэр баар. Ытык киһи элбэх наҕараадалаах. Олортон «Учитель Учителей Республики Саха (Якутия)» түөскэ кэтиллэр бэлиэтин олус күндүтүк саныыр.
Бэлиэтээн эттэххэ, «Үйэ саас» бочуоттаах бэлиэ СӨ Бэрэсидьиэнин ыйааҕынан 2003 сыллаахха бигэргэтиллибитэ. Бу бочуоттаах бэлиэ дастабырыанньаны кытары туттарыллар уонна 100 тыһ. солк. харчынан бириэмийэлээх.
СӨ Ил Дарханын уонна Бырабыыталыстыбатын пресс-сулууспата
Лев Павлов көҥүл тустууга юниордар истэригэр аан дойду чөмпүйэнээтигэр үрүҥ көмүс мэтээли ылары ситистэ. Кини…
Бүгүн, балаҕан ыйын 8 күнүгэр, Саха сирин соҕуруу, хотугулуу-илин, күнүс арҕаа улуустарыгар сорох сиринэн ардах,…
Бүгүн НТВ ханаал “Чудо” биэриитигэр Сунтаар улууһун Элгээйи орто оскуолатын үөрэнээччитэ, эдэр орнитолог, 11 саастаах…
Аҕыйах хонуктааҕыта Сунтаар улууһун Куокуну нэһилиэгэр Улахан Табаҕа киэҥ нэлэмэн, үрдүк үүнүүнү биэрэр бааһыната талах…
Оҕо барахсан хайа да кэмҥэ арахсыспат аргыһа – оонньуур буоллаҕа. Онон “Наука 0+” билим бэстибээлин…
Бу күннэргэ өрөспүүбүлүкэ улуустарыгар ититии сезона саҕаланан эрэр. Мэҥэ Хаҥалас улууһун пресс-сулууспата дьаһалта телеграм-ханаалыгар иһитиннэрбитинэн,…