Анисия Степанова аан дойду үс бастыҥ сэһэнньитин иһигэр киирдэ

Мэҥэ Хаҥалас улууһун Гаврил Колесов аатынан Олонхо Дьиэтин үлэһитэ Анисия Степанова Узбекистан Өрөспүүбүлүкэтин Хива куоратыгар IV норуоттар икки ардыларынааҕы Бахши бэстибээлигэр бочуоттаах үһүс миэстэни ылла.

Арассыыйаттан соҕотох бэрэстэбиитэл да буоллар, саха кыыһа эһээтин “Күн Эрили” олоҥхотун толорон, аан дойду үс бастыҥ сэһэнньитин иһигэр киирдэ.

Кини Мэҥэ Хаҥалас улууһун биллэр олоҥхоһута Николай Степанов — Ноорой сиэнэ. Үгэс буолбут култуураны харыстыырга туһуламмыт бэстибээлгэ 40-тан тахса дойду сэһэнньиттэрин түмтэ.

Маны таһынан, Түүр эйгэтин II култуурунай пуорумун чэрчитинэн, биллиилээх култуура уонна ускуустуба деятеллэрэ, сэһэнньит ускуустубатын үөрэтэр учуонайдар тыл эттилэр. Г.Г. Колесов аатынан Олонхо Дьиэтин дириэктэрэ Евдокия Иванова өрөспүүбүлүкэҕэ Олоҥхо эпоһын сайыннарыыга, тарҕатыыга туох үлэ ыытылларын туһунан дакылаат оҥордо. Эспиэрдэр уонна истээччилэр матырыйааллар систиэмэлээхтэрин уонна дириҥ ис хоһоонноохторун үрдүктүк сыаналаатылар.

Ону тэҥэ пуорум кэмигэр Г.Г. Колесов аатынан Олонхо Дьиэтин уонна Юнус Раджаби аатынан Узбек национальнай муусукатын уонна ускуустубатын института бииргэ үлэлииргэ Сөбүлэһии түһэристилэр. Кыргызстан, Туркменистан уонна Казахстан сэһэнньиттэрин кытта холбоһуктаах бырайыактары олоххо киллэрэр кыахтары дьүүллэстилэр.

Бахши бэстибээлэ быйыл төрдүс төгүлүн ыытылынна. Бэстибээл бастаан Узбекистан бэрэсидьиэнэ Шавкат Мирзиев кыттыылаах Термез куоракка саҕаламмыта, онтон Нукус уонна Гулистан куораттарга салҕаммыта.

Хива куоракка ыытыллыбыт тэрээһиҥҥэ Узбекистан култууратын миниистирэ Озодбек Назарбеков, Азербайджан култууратын миниистирэ Адиль Керимли, ТЮРКСОЙ генеральнай сэкирэтээрэ Султан Раев, Түүр култууратын уонна нэһилиэстибэтин пуондатын бэрэсидьиэнэ Актоты Райымкулов, Түүр Академиятын бэрэсидьиэнэ Шахин Мустафеев, ТЮРКПА генсэкирэтээрэ Мехмет Сюрейор, Кыргызстан култууратын миниистирин солбуйааччыта Гульбара Абдыкалыкова, «Манас» Национальнай академия бэрэсидьиэнэ Азиз Биймырза уулу, «Манас» академия национальнай Сэбиэтин чилиэннэрэ, Кыргыз Өрөспүүбүлүкэтин култууратын диэйэтэлэ Кайрат Иманалиев уонна академик Абдылдажан Акматалиев кыттыыны ыллылар, диэн иһитиннэрэр СӨ Ил Дарханын уонна бырабыыталыстыбатын пресс-сулууспата.