Анна Фидря үйэлээх үбүлүөйүн бэлиэтээтэ

Сэтинньи 10 күнүгэр тыыл уонна үлэ бэтэрээнэ, Аҕа дойду Улуу сэриитин кыттыылааҕын огдообото Анна Алексеевна Фидря сүүс сааһын туолла. Бу кэрэ-бэлиэ күнүнэн кинини СӨ үлэҕэ уонна социальнай сайдыыга миниистирэ Елена Волкова уонна Дьокуускай куорат социальнай көмүскэлин управлениетын  салайааччы Матрена Анемподистова эҕэрдэлээтилэр.

Миниистир Анна Алексеевнаҕа  Арассыыйа бэрэсидьиэнэ Владимир Путин  эҕэрдэ тэлэгирээмэтин уонна Айсен Николаев аатыттан уһун үйэлээхтэргэ бэриллэр “Үйэ саас” бочуоттаах бэлиэни  туттарда.

Анна Алексеевна –  бэйэ дьыалатыгар бэриниилээх буолуу чаҕылхай холобура. Кини Киров уобалаһыгар элбэх оҕолоох дьиэ кэргэҥҥэ төрөөбүтэ, эдэр сааһыттан сэрии ыарахаттарын билбитэ. 1943 сыллаахха мэдиссиинэ оскуолатын бүтэрэн баран, олоҕун дьону быыһыырга анаабыта. Сэрии кэннинээҕи  ыарахан кэмнэр, тымныы уонна аччыктааһын баалларын да иһин, уонунан сылларга Новосибирскай уобалас Локтенок сэлиэнньэтигэр биэлсэр-акушерынан үлэлээбитэ.

Кини 1948 сыллаахха Аҕа дойду Улуу сэриитин кыттыылааҕа, номох буолбут “Катюшаҕа” сулууспалаабыт Фидря Василий Григорьевичка кэргэн тахсыбыта. Василий Фидря кыайыыны  Кенигсбергэ көрсүбүтэ, “Хорсунун иһин” уонна “Кенигсберы ылыы иһин” мэтээллэринэн наҕараадаламмыта.

Анна Алексеевна уонна Василий Григорьевич икки оҕону улаатыннарбыттара. Кинилэр  түөрт сиэннээхтэр, түөрт хос сиэннээхтэр уонна икки хос-хос сиэннээхтэр.

СӨ Үлэҕэ уонна социальнай сайдыыга министиэристибэтин пресс-сулууспата