Анна Тотонова: “Саҥа дьиэбит биһигиттэн улахан эппиэтинэһи ирдиир”

2019 сылтан олоххо киллэриллибит “Култуура” национальнай бырайыак чэрчитинэн өрөспүүбүлүкэҕэ култуура 45 эбийиэгэ тутулунна, 139 кулууп матырыйаалынай-тиэхиньиичэскэй  баазата тупсарылынна, култуура 19 тэрилтэтигэр олохтоох өрөмүөн оҥоһулунна уо.д.а.

Санатан эттэххэ, бу дьыл олунньутугар  Сунтаар улууһун Кэмпэндээйи сэлиэнньэтигэр “Сайдыы” Култуура уонна сынньалаҥ  дьиэтэ аһыллыбыта. Саҥа эбийиэк “Култуура” национальнай бырайыак чэрчитинэн тутуллан үлэҕэ киирбитэ.

Тыһыынча квадратнай миэтэрэ кэриҥэ иэннээх саҥа  дьиэни  дизайн-бырайыагы оҥорууга быһаччы кыттыспыт  Култуура дьиэтин үлэһиттэрин уонна олохтоохтор баҕа санааларын учуоттаан туппуттар.

Биир мэндиэмэннээх таас дьиэҕэ 150 миэстэлээх көрөөччү саалата, үҥкүү, гримернай, дьарыктанар хостор, араас сиэри-туому оҥорууга ураһа быһыылаах туспа саала  бааллар.

Култуура уонна сынньалаҥ дьиэтин дириэктэрэ Анна Тотонова:

— 2019 сылы көрсөргө биһиги кулууппут уокка былдьанан, кулууба суох хаалбыппыт. Ити сылтан  Култуура саҥа дьиэтин тутуу боппуруоһун бырабыыталыстыба отчуоттарыгар тиийэ туруорсан барбыппыт. Сенатор Александр Акимовка эмиэ кыһалҕабытын тириэрдибиппит. Биһиги ыра санаабыт дьэ туолан, билигин   үөрэ-көтө үлэлии сылдьабыт.

Махталбытын дойду бэрэсидьиэнэ Владимир Путиҥҥа, Ил Дархан Айсен Николаевка, улууспут баһылыга Анатолий Григорьевка, нэһилиэк баһылыга Александр Игнатьевка тириэрдэбит.

Биһиги ордук үҥкүү саалата баар буолбутуттан үөрэбит. Тоҕо диэтэххэ, 500-чэ киһилээх кыра сэлиэнньэҕэ үс үҥкүү ансаамбыллаахпыт. Үҥкүү кэлэктииптэрин сэргэ ырыаһыттарбытынан, норуот маастардарынан аатырабыт.

Саҥа дьиэбитигэр үлэһиттэр наадалар. Тэриллэрбит бары аныгылар, ону анал үөрэхтээх исписэлиис быһаарсар кыахтаах.  Ону таһынан  хореограф уонна звукооператор  наадалар. Оттон кулуупка биир эрэ штат көрүллэр (500-чэҕэ эрэ тиийэр нэһилиэнньэлээх пууҥҥа тиийэр нуорманан).

Сырдык, тупсаҕай дьиэ аныгы технологияларынан, уотунан-күөһүнэн, ЛЕД экранынан толору хааччыллыылаах. Онон үгүс тэрээһиннэри ыытар кыахтанныбыт,  саҥа дьиэлээх-уоттаах дьон иннибит диэки айанныыбыт.

Аалай лиэнтэни быһыыга Ил Дархаммыт бэйэтинэн кэлэн  кыттыыны ылбыта олус долгутуулаах, үөрүүлээх этэ. Саҥа дьиэбит инникитин үгүс үлэни ыытарга кынаттыыр, ону тэҥэ эппиэтинэһи ирдиир, — диэн үөрүүтүн үллэһиннэ.