Антоновка пааркатыгар — икки кыталык

Ньурба улууһун Антоновка оскуолатын 28-с выпуһа арт-эбийиэк  бэлэх ууннулар. Бу туһунан олохтоох дьаһалта иһитиннэрдэ.

— Идеялаабыт уонна бииргэ  үөрэммит оҕолорун түмпүт киһинэн Дьокуускайга олорор Марианна Быгый буолар. Арт-эбийиэги   Тааттаттан төрүттээх уус, аан дойду, Россия, өрөспүүбүлүкэ таһымнаах күрэхтэр кыттыылааҕа Василий Тистяхов оҥордо.

Бу выпуск 1995 с. оскуоланы бүтэрэллэригэр Кыайыы 50 сыла эбит. Аны 80 сылыгар, выпуск 30 сылынан бэйэлэрэ оонньоон ааспыт сирдэригэр, төрөөбүт дойдуларыгар сэргэх хамсааһыны саҕалаатылар. Олохтоохтор махталбыт бэлиэтигэр кыталыктаах, оҕо, улахан киһи олорор сирдээх арт-эбийиэккэ харыстабыллаахтык сыһыаннаһыаҕыҥ, — диэн олохтоох дьаһалта иһитиннэрдэ.