Аны куорат уулуссаларын мээнэ хаһыы, алдьатыы суох буолуоҕа

Массыына уонна сатыы киһи хаамар сирэ, газоннар, олордуу үүнээйини чөлүгэр түһэрии хаачыстыбата, сир үлэтин тэрийии култуурата намыһаҕа – Дьокуускайга кэнники сылларга сытыытык турар кыһалҕанан буолар.

Хас сыл аайы куорат үрдүнэн сүүһүнэн дьааманы, ханаабаны эбэтэр траншеяны хаһаллар. Куоракка ыытыллар сир үлэтин ахсаана кэнники сылларга 2 төгүл үрдээтэ диэн Дьокуускай куорат баһылыга Евгений Григорьев бэйэтин телеграм-ханаалыгар суруйар:

«Өскөтүн сири хаһыыга 2021 сылга 794 көҥүл бэриллибит буоллаҕына, 2024 сылга – 1608 тиийдэ (2023 сылга – 1699). Биир өттүттэн үчүгэй: куоракка элбэх тутуу барар, инженернэй коммуникациялар саҥардыллаллар уонна тардыллаллар. Иккис өттүнэн – ыытыллар сир үлэлэрэ куоракка киртитии сүрүн төрүөтүнэн буолаллар. Бу хаһыылар куорат олохтоохторун, ыалдьыттарын мэһэйдииллэр, сороҕор кутталы даҕаны үөскэтэллэр (холобур, үчүгэйдик күрүөлэммэтэх-хаһааламматах буоллаҕына). Ол иһин быйыл Олох-дьаһах хаһаайыстыбатын департаменыгар Дьокуускай куорат тупсарыытын быраабылатыгар сөптөөх уларытыылары киллэрэргэ сорудахтаабытым. Бүгүҥҥү сессияҕа Дьокуускай куорат Дууматын дьокутааттара ону көрдүлэр уонна ылыннылар. Саҥа быраабыла сүрүн сыалынан – бу эйгэҕэ бэрээдэги олохтооһун, сир үлэтигэр сакаасчыттар (үксүн, бу ресурсаны хааччыйар тэрилтэлэр – газовиктар, энергетиктэр эбэтэр Водоканал, тутуу фирмалара) эппиэтинэстэрин үрдэтии буолар. Быраабылаҕа биһиги күрүөлэргэ-хаһааларга, аншлагтарга, кытаанах бүрүөһүнү чөлүгэр түһэриигэ уонна мэктиэлиир эбэһээтэлистибэлэргэ саҥа ирдэбиллэри олохтоотубут. Холобур, суолга хаһыы үлэлэрин кэннэ, аспаал бүтүннүү чөлүгэр түһэриллиэҕэ».

Атын саҥа киллэрии – бэдэрээтчик үлэлиэхтээх сирин буору, кырыһы, матырыйааллары, тутуу уонна көтүрүү тобохторун харайарга миэстэни оҥоруохтаах. Саҥа быраабылаҕа итинтэн даҕаны атын уларыйыылар, уопсайынан – уонунан ааҕыллар саҥа ирдэбиллэр киирдилэр.

Дьокуускай куорат Дууматын саҥа Быраабылалара официальнайдык бэчээттэммиттэрин кэннэ күүһүгэр киириэҕэ.