Дьокуускайга улахан дьоҥҥо программирование оскуолата аһыллыаҕа

Аны күһүн Дьокуускайга Уһук Илин уокурукка маҥнайгы программирование оскуолата аһыллан, үгүс киһини цифрофой технология араас көрүҥэр үөрэтиэ.

Бэҕэһээ, балаҕан ыйын 17 күнүгэр, Айсен Николаев сотору үлэҕэ киириэхтээх, «Школы 21» программирование оскуолатын төһө бэлэмнээҕин бэрэбиэркэлээтэ. Бу үс этээстээх оскуола тутуутун «Сбербанк» үбүлүүр. Айсен Николаев өрөмүөн үлэтин түргэнник бүтэрэн аһарга бэлэмнииллэригэр соруйда.

Бу оскуолаҕа 18 сааһыттан үөһээ саастаах ким баҕарар үөрэнэн ИТ-исписэлииһэ буолуон сөп. Билиҥҥи туругунан 3000 кэриҥэ сайаапка киирбит. Сүүмэрдээһини ааспыт дьон манна үөрэниэхтэрэ уонна ИТ эйгэтигэр үлэлиир кыахтаныахтара. Онуоха босхо үөрэтиэхтэрэ. Бастакы сүүмэрдээһин түһүмэҕэ алтынньы 23 күнүттэн саҕаланыаҕа.

«Школа 21» — бу «Сбербанк» ИТ исписэлиистэри бэлэмниир инновационнай бырайыага. Маннык оскуолалар Москваҕа, Казаҥҥа, Новосибирскайга уонна Сургукка үлэлии тураллар. Быйыл күһүн Великай Новгородка уонна Дьокуускайга аһыллыахтара.