Аны күһүҥҥү быыбары тэрийээччилэри үөрэтии салҕанар

Бу нэдиэлэҕэ учаастактааҕы быыбар хамыыһыйаларын чилиэннэригэр Биир кэлим куоластааһын күнүгэр быыбары бэлэмнээн уонна тэрийэн ыыталларыгар видео-конференц-сибээс нөҥүө элбэх сэминээрдэри ыыттылар.

Сэминээргэ Орто Халыма, Муома, Бүлүү, Горнай, Мэҥэ Хаҥалас, Амма, Сунтаар, Эбээн Бытантай, Нам, Өймөкөөн улуустарын быыбары тэрийээччилэрэ кытыннылар диэн СӨ Киин быыбардыыр хамыыһыйата иһитиннэрэр.

Сэминээр-үөрэх тиэмэтинэн олохтоох бэйэни салайыныы уорганнарын быыбардарыгар хандьыдааттары туруоруу уонна регистрациялааһын, хандьыдааттар испииһэктэрин бигэргэтии, регистрациялааһын, илии баттааһын лиистэрин бэрэбиэркэлээһин буолла.

Бэлиэтээн эттэххэ, сэминээрдэри СӨ Киин быыбардыыр хамыыһыйатын үлэһиттэрин кытары тэҥҥэ Дьокуускай куорат, Мииринэй, Ленскэй территориальнай быыбардыыр хамыыһыйаларын бэрэссэдээтэллэрэ уонна үлэһиттэрэ ыыттылар.

Тэрийээччилэр бэйэлэрин уопуттарын үллэһиннилэр, сэминээр кыттааччыларын ыйытыыларыгар хоруйдаатылар, араас түбэлтэҕэ хайдах сыһыаннаһыахха сөбүн биирдиилээн холобурдарынан быһаардылар.

СӨ Киин быыбардыыр хамыыһыйата быыбары тэрийээччилэргэ уонна быыбар үлэтин атын кыттааччыларын үөрэтиини уонна сүбэни-аманы биэриини салгыы ыытыаҕа.