Андрей Артамонов: «Аны сайын «Бөртө оһуохайын» бэстибээлин ыытар баҕалаахпыт»

Олунньу 7-8 күннэригэр Хаҥалас улууһун 2-с Малдьаҕар нэһилиэгэр Улахан Ааҥҥа «Бөртө Оһуохайа» ыытыллан, дьон-сэргэ олус сэҥээрдэ.

Өрөспүүбүлүкэтээҕи тэрээһини Хаҥалас улууһун култуураҕа салаата, 2-с Малдьаҕар нэһилиэгин дьаһалтата, тэрилтэлэрэ, Норуот айымньытын улуустааҕы киинэ, өрөспүүбүлүкэтээҕи “Оһуохай” түмсүү кыттыгастаах уонна  2-с Малдьаҕар олохтооҕо,   оҕолорго «Саха Боотур» байыаннай-спортивнай бэлэмнэнии уонна патриотическай иитии киинин салайааччыта Андрей Артамонов-Малдьаҕар Бөртө, “Күн дьоно” фольклор бөлөҕүн салайааччыта Евдокия Ивановна Кондратьева-Далбар Кылыһах көҕүлээһиннэринэн тэрилиннэ.

Тэрээһин икки күн ньиргиччи үрдүк таһымнаахтык ыытыллан, Мэҥэ Хаҥаластан, Тааттаттан, Ньурбаттан, Намтан, Хаҥаластан, Дьокуускайтан кэлбит этээччилэр сөрү диэн сөҕөн, астынан тарҕастылар. Дьүүллүүр сүбэҕэ Дьокуускайтан, улуустартан тиийэ айаннаан кэлэн үлэлээтилэр.

Байыаннай дьайыы бэтэрээнэ, 2-с Малдьаҕар нэһилиэгин бочуоттаах гражданина, кикбоксиҥҥа СНГ үтүөлээх тириэньэрэ, «Саха Боотур» ыччат уһуйаанын салайааччыта Андрей Артамонов-Малдьаҕар Бөртө  этэринэн, эдэр боотурдарга Сүр көтөҕөр оһуохай баар. Аныгы Саха Боотура барытыгар сатабыллаах. Кини булчут, сылгыһыт, сайын оттуур, кыһын мас мастыыр. Олордо да олоҥхолуур, турда да оһуохайдыыр бары өттүнэн сайдыылаах эр бэрдэ.

— Биһиги Хаҥалас улууһун Улахан Аан сэлиэнньэтин Ампаардаҕар  кырата сэттэлии күннээх  оҕо-ыччат байыаннай-спортивнай уонна патриотическай сүлүөтүн 5 төгүл ыыппыт үөрүйэхтээхпит. Бу сылларга 7 улуустан 122 оҕо кэлэн барда.

СӨ Судаарыстыбаннай Мунньаҕын  (Ил Түмэн) дьокутааттарын, Александр Подголовы  кытары үлэлэһэ сылдьабын, кинилэр биһиэхэ тахсаннар  базабытын көрбүттэрэ.  Байыаннай дьайыыга этэрээккэ бииргэ сылдьыбыт уолаттарбын,  дьокутааттары  эрэгийиэннэр икки ардыларынаааҕы сүлүөккэ ыҥыртыыбын. Сүлүөппүт сарсыныгар  Туймаада ыһыаҕар сылдьыахпыт.   «Саха Боотур» хамсааһыны дьон оҕону, ыччаты иитии ньыматын быһыытынан  сэргиир. Нууччалыы эттэххэ, «Интеграция национальных культурных традиций народа саха по методам и способам патриотической работы» диэн эмиэ биир сүрүн хайысха.  Арассыыйа Норуоттарын сомоһоҕууларын сылыгар  араас омук уолаттарын ыҥыран, Култуура сылынан  бэйэбит култуурабытын көрдөрүөхпүт.

Арассыыйаҕа Норуоттар сомоҕолоһууларын, Саха сиригэр Култуура сылларынан «Бөртө Оһуохайын» ыытар туһунан этиибитин култуура улуустааҕы салаатыгар киллэрэн, өйөбүлү ылан, “Бөртө Оһуохайа” өрөспүүбүлүкэ таһымыгар ааста.

Сүрүн бириискэ бүтүн убаһаны туруораммыт, оһуохай бары кыттыылаахтара, Дархан этээччилэр сөҕөн-махтайан, махтанан бардылар. Мантан эрдийэммит, оһуохайы оройуттан тутан, ыччаппытыгар сахалыы тыыны уһугуннарар сорук туруорунабыт. Онон  быйыл сайын Ампаардаах алааһыгар уһуйааннар быыстарыгар  «Бөртө Оһуохайын» бэстибээлин ыытар баҕалаахпыт  туһунан “Оһуохай» уопсастыбаны (Александр Джурович Даниловы), Дархан оһуохайдьыттары   кытары сөбүлэһиигэ илии баттастыбыт. Бэстибээл ыытыллыан сөбүн туһунан этиини «Айгы ситимэ»уопсастыбаннай түмсүү  салайааччыта Александр Протодьяконов киллэрдэ. Дархан этээччилэр Валентин Васильевич Хорунов, Айыы Уолана Алаас,  Аскалон Лукич  Егоров-Өркөн Дьол уо.д.а. өйөөтүлэр. Оһуохай сүрүн түмүр күүстээх, оҕолорбут уйулҕаларын уһугуннарар, сааһылыыр хайысха диибит.  Уһуйааммыт үлэтин өрөспүүбүлүкэҕэ киэҥник тарҕатыахха наадатын туһунан кэпсэттибит,    — диэн көҕүлээччи, тэрийсээччи Андрей Юльевич Артамонов-Малдьаҕар  Бөртө «Бөртө Оһуохайа» өссө да инники кэскиллээҕин туһунан кэпсээтэ.