Аныгыскы нэдиэлэҕэ буруо сүтүөҕэ

Аныгыскы нэдиэлэҕэ тыал хайысхата уларыйан уонна салгын температурата түһэн, бу күннэргэ турбут буруо сүтүөҕэ. Бу туһунан Саха сиринээҕи гидрометеорология уонна тулалыыр эйгэни кэтээн көрөр управление начаалынньыгын солбуйааччы – гидрометкиин начаалынньыга Татьяна Маршалик иһитиннэрдэ. 

Билиҥҥитэ өрөспүүбүлүкэ сиригэр-уотугар өссө даҕаны кыра буруо баар. Бу буруо Хабаровскай кыраайтан уонна Саха сирин соҕуруулуу-илиҥ өттүгэр буолбут ойуур баһаарыттан кэлбит.

Татьяна Маршалик эппитинэн, аныгыскы нэдиэлэҕэ өрөспүүбүлүкэҕэ Арктикаттан тымныы салгын кэлэрэ сабаҕаланар. Онон, халлаан туруга кыралаан уларыйан, салгын температурата түһэн бу күннэргэ турбут буруо сүтүөҕэ.