Аныгыскы нэдиэлэҕэ сылааһы биэрии  түһүмэҕинэн түмүктэниэҕэ

Саха сиригэр  ыам ыйын 21 күнүттэн сылааһы биэриини түһүмэҕинэн түмүктээһин саҕаланарын туһунан Дьиэ-уот хомунаалынай хаһаайыстыба уонна энэргиэтикэ министиэристибэтэ иһитиннэрдэ.

Ол курдук сылааһы биэрии тохтотуллуоҕа:

Ыам ыйын 21 күнүттэн  – Таатта, Чурапчы, ыам ыйын 22 күнүттэн – Уус Алдан, ыам ыйын 23-26 күннэриттэн Дьокуускайга, Томпо, Горнай, Хаҥалас, Бүлүү уонна Сунтаар, ыам ыйын 25 күнүттэн —  Амма, Мэҥэ Хаҥалас, ыам ыйын 31 күнүттэн — Дьааҥы, Алдан уонна Эбээн Бытантай, Үөһээ Халыма уонна Кэбээйи, бэс ыйын 3 күнүттэн  – Орто Халыма, бэс ыйы 6 күнүттэн Өлөөн   улуустарыгар.

Дьиэ-уот, хомунаалынай хаһаайыстыба уонна энэргиэтикэ миниистирэ Вячеслав Емельянов бэлиэтээбитинэн, муниципальнай тэриллиилэр министиэристибэни кытта кэлэр оттукка систиэмэлэр эрэллээхтик үлэлииллэрин хааччыйар туһугар  сылааһы биэрии схематын оҥорорго үлэни ыытыахтаахтар.

Ону таһынан Арассыыйа Энергетикаҕа министиэристибэтин уурааҕынан,  сылааһы биэрэр кэмҥэ бэлэмнэнии саҥа быраабылата бигэргэннэ.

«Улуустар баһылыктара уонна сылааһынан хааччыйар тэрилтэлэр уураах ирдэбиллэрин билсиэхтээхтэр. Оттук сезонугар бэлэмнэнии – биһиги килиимэммит усулуобуйатыгар дьоһун суолталаах соруктартан биирдэстэрэ”, — диэтэ Вячеслав Емельянов.

Уураах быһыытынан,  муниципалитет таһымыгар хонтуруол уонна эппиэтинэс олохтоох бэйэни салайыныы уорганнарыгар сүктэриллэр. Сылааһынан хааччыйар уонна сылаас ситимин тэрилтэлэрэ ситимнэр хааччаҕа суох үлэлииллэрин, өрөмүөнү кэмигэр оҥоруу уонна тиэхиньиичэскэй хааччыйыы иһин эппиэттииллэр. Ону таһынан салайар тэрилтэлэр уонна олорор дьиэни бас билээччилэр табаарыстыбалара дьиэ иһинээҕи систиэмэлэри бэлэмниир, тэриллэр үлэлиир кыахтарын бэрэбиэркэлиир эппиэтинэстээхтэр.

Саха сирин Ил Дарханын уонна бырабыыталыстыбатын  пресс-сулууспата