Анжелика Лебедева: “Сийиэс түмүгүнэн улахан былаан ылыллан, көдьүүстээх үлэ барыа диэн эрэнэбин”

Бүгүҥҥүттэн Саха тылын, литэрэтиирэтин уонна култууратын учууталларын 3-с өрөспүүбүлүкэтээҕи сийиэһэ саҕаланна. Саха тыйаатырыгар бүгүн саха тылын, литэрэтиирэтин уонна култууратын үүнэр көлүөнэҕэ иҥэрэр туһугар үлэлии-хамсыы сылдьар учууталлар, педагогтар, тыл үөрэхтээхтэрэ муһуннулар. Сарсыардаттан сахалыы тыыннаах уораҕайга саха тылын харыстааһын, сайыннарыы, эйгэтин кэҥэтии туһунан киэҥ хабааннаах санааны атастаһыы, ырытыы, 3-с өрөспүүбүлүкэтээҕи сийиэс үлэтин тосхоллуур тэрээһин буола турар.

Хаҥалас улууһуттан Бырааттыы Николаевтар ааттарынан 2-с Дьөппөн орто уопсай үөрэхтээһинин оскуолатын саха тылын уонна литэрэтиирэтин учуутала, СӨ Үөрэхтээһинин систиэмэтин туйгуна, СӨ педагог-наставнига Анжелика Лебедева сийиэскэ кытта сылдьар. Кини сийиэс туһунан санаатын маннык үллэһиннэ:

— Хаҥалас улууһуттан 24 дэлэгээт буолан кэллибит. Мин Саха тылын, литэрэтиирэтин уонна култууратын учууталларын сийиэһигэр үһүстээн дэлэгээтинэн талыллан кэллим. 3-с сийиэс А.Я. Уваровскай төрөөбүтэ 225 сылыгар, саха суругунан литэрэтиирэтэ төрүттэммитэ 125 сылыгар ананна. 2022 сыллаахха ыытыллыбыт сийиэс кэнниттэн киэҥ далааһыннаах үлэ барбыта көһүннэ. Ол курдук, учуобунньуктар саҥардылыннылар, саха тылын, литэрэтиирэтин үөрэтиигэ сыыппара эйгэтэ киирдэ, «Төрүт тыл» порталы туттар дьон ахсаана эбиллибит, о. д. а. «Саха тылын, литэрэтиирэтин уонна култууратын үөрэтии» кэнсиэпсийэтин (2023-2030 сыллар) соруктарын уонна хайысхаларын олоххо киллэрии тула кэпсэтии барыахтаах. Кэнники сылларга саха тылын үөрэтэр оҕо ахсаана элбээн иһэрэ үөрдэр. Бу сийиэс түмүгүнэн улахан былаан ылыллан, көдьүүстээх үлэ барыа диэн эрэнэбин.