АПК-ҕа БАС туһаныы туһунан

Бүгүн «Сыыппара алмааһа» пуорум кэмигэр «Арассыыйа эрэгийиэннэригэр БАС туһаныы: дойдуга аска-!үөлгэ куттал суох буолуутун бастыҥ уопута» панельнай сиэссийэ буолла.

Манна Саха сиринээҕи ТХНЧИ дириэктэрэ Михаил Черосов, «СӨ АПК ресурсанан хааччыйыыга киинэ» дириэктэрин солбуйааччы Моисей Захаров, «Мелиоводхоз управлениета» тэрилтэ салайааччытын солбуйааччы Михаил Лоскин, «Геоскан» ГК стратегическай бырайыактарын салайааччы Роман Намов, «Судаарыстыбаннай транспортнай лизинговай хампаанньа»дириэктэрэ Алексей Куканов уо.д.а.,эспиэрдэр кытыннылар.

Тыа хаһаайыстыбатыгар пилота суох көмөлөһөөччүнү туһаныы уопутун кыттааччылар иһиттилэр. Чуолаан, Ярославскай уобаласка итинник уопут баар. Истээччилэр ХИФУ-га геочахылары ырытыыга каадыры бэлэмнээн таһаарыыга болҕомтону уурбуттарын кэрэхсээтилэр. Чуолаан, бу идэлэргэ киһитэ суох аппарааттары кытта эмиэ үлэ киирэр.

«Геоскан» тэрилтэ үлэтин билиэх баҕалаах элбэх быһыылаах. Ол курдук, бу аан дойдуга 50 тахса дойдуга бэйэтин бородууксуйатын таһаарар технологическай хампаанньа Арассыыйатааҕы бөлөҕө. БАС-тары айан, оҥорон таһаарар. Бу технологияны кадастр үлэтигэр, сири-уоту кэтээн көрүүгэ туһаныахха сөп. Ол аата агро-бырамыысыланнас комплексыгар көдьүүстээх. Бэл, суолу, турбалары, уот ситимин кэтээн көрүүгэ туһаныахха сөбүн салайааччы эттэ. Ыксаллаах балаһыанньаны кэтээн көрүүгэ да туһаныахтарын сөп курдук. Хампаанньа Саха сирин кытта 2017 с. сибээстэһэр. Саха сирин курдук киэҥ сирдээх ураты эрэгийиэҥҥэ чахчылары сатаан туһанан көдьүүстээхтик салайарга бу тэрилтэ оҥоһуктарын туһаныахха сөп эбит.

Ааптар хаартыскаҕа түһэриитэ