Аппааны сэл. киинэттэн киирбит үбүнэн Култуура дьиэтигэр наадалаах тээбирини атыылаһаллар

Нам улууһун Аппааны сэлиэнньэтигэр “Култуура” национальнай бырайыагынан 2022 сыллаахха тутуллубут Култуура дьиэтигэр наадалаах малы-салы киинэни көрдөрүүттэн киирбит үбүнэн атыылаһаллар. Ити сыл саҥа эбийиэккэ «Экстра Синема» ситим киинэ көрдөрөр саалата аһыллыбыта.

Бу кэм устатыгар киинэни көрдөрүүттэн киирбит үп 2,8 мөлүйүөнтэн тахса солкуобайга тэҥнэстэ, ол эбэтэр «Экстра Синема» платформа туруорбут тээбиринин сыанатын үс төгүл сапта.

Култуура дьиэтин дириэктэрэ Саргылана Пономарева этэринэн, киирбит үбү тэрээһиннэргэ туттуллар тиэхиньикэҕэ, звукорежиссерга аналлаах көмпүүтэргэ, киинэ саалатын сырдатар уонна тыаһын-ууһун тээбиринигэр, атын да тиэхиньикэни саҥардыыга ыыппыттар, туттуллар матырыйааллары атыыласпыттар.

“Аппааныга чугастааҕы Таастаах, Бөтүҥ, Искра сэлиэнньэлэриттэн көрөөччү кэлэр”, — диир кулууп үлэһитэ Гаврил Макаров.

“Төһө да Нам улууһугар алта киинэ саалата үлэлээтэр, 1,6 нэһилиэнньэлээх Аппааны бэртээхэй түмүгү биэрэ олорор —  быйылгы сылга 177% уонна киинэҕэ ортотунан 56 киһи сылдьар”, — диэн бэлиэтээтэ “Экстра Синема” быракаат салаатын салайааччыта Николай Егоров.

2025 сыл түмүгүнэн Нам улууһа өрөспүүбүлүкэҕэ ситим каассатын хомуурунан 3,4 мөл. солкуобайтан тахсаны киллэрэн лиидэр буолла.