Аппааныга Улуу Кыайыы 80 сылыгар анаммыт тэрээһин өрө көтөҕүллүүлээхтик ыытылынна

Бэҕэһээ Нам улууһугар Аппааныга Улуу Кыайыы 80 сылынан тэрээһин өрө көтөҕүллүүлээхтик буолла.

Сарсыарда «Өлбөт үйэлээх полк» аахсыйаҕа И.Е. Винокуров аатынан оскуола оҕолоро, кыһа кэлэктиибэ, нэһилиэк тэрилтэлэрэ нэһилиэк уопсастыбаннай олоҕор көхтөөх кыттаччы С.А.Находкин салайыытынан киин уулуссанан хааман Кыайыы искибиэригэр кэллилэр. Искибиэргэ кэлбит ыҥырыылаах ыалдьыттар, үлэ, тыыл бэтэрээннэрэ, сэрии сылларын оҕолоро, олохтоохтор уруйдуу-айхаллыы көрүстүлэр.

Бырааттыы Марковтарга анаммыт пааматынньыкка сибэкки дьөрбөтүн уурдулар.  Салгыы улуус баһылыгын солбуйааччы А.И.Павлов, нэһилиэк баһылыга И.Д.Ноговицын мустубут дьоҥҥо Улуу Кыайыы 80 сылынан эҕэрдэлэрин тиэртилэр. Оҕолор Улуу Кыайыы туһунан сүрэҕи-быары өрүкүтэр, долгутар хоһооннору доргуччу аахтылар, кыайыыны уһансыбыт ырыалар, нэһилиэк аҕам саастаахтарын «Сыдьаайа»үҥкүү ансаамбылын намыын үҥкүүлэрэ тэрээһини киэргэттилэр. Оскуола үөрэнээччилэрэ үгэс буолбут «Саллаакка сурук» үс муннуктаах суруктарын почта дьааһыгар уктулар. Тэрээһин түмүгэр түһүлгэҕэ мустубут ыалдьыттарга итии чэй, «Саллаат хааһыта» биэрдилэр. Култуура киинигэр бэтэрээннэргэ анаан «Истиҥ санааттан» диэн итии чэйдээх остуол тэрилиннэ. Манна «Хатыҥчаана» уһуйаан, оскуола, олохтоох ыччат түмсүүтүн оҕолоро эҕэрдэлээтилэр. Сэрии сылларын оҕолоругар, бэтэрээннэргэ улуус баһылыга Ю.И.Слепцов,  нэһилиэк баһылыга И.Д. Ноговицын үбүлүөйдээх мэтээллэри, сыаналаах бэлэхтэри дохсун ытыс тыаһыгар арыаллатан туттардылар.

Кыайыы искибиэригэр «Өйбөбүнньүк чүмэчитэ» аахсыйаҕа уонна салюту көрө элбэх киһи муһунна.

Нина Саввина,

Аппааны, Нам.

Ааптар хаартыскаларга түһэриитэ