“Аптаах дорҕоон” дьиэ кэргэн киинэтэ сотору киинэ тыйаатырдарыгар тахсыаҕа!

Ааспыт күннэргэ СӨ Муусука үрдүкү оскуолатыгар “Аптаах дорҕоон” уус-уран киинэни сабыылаах көрүү буолан ааста.

Бу киинэҕэ сүрүн оруолларга МҮО устудьуоннара Дайаана Тимофеева, Витя Семёнов уонна Айсен Местников оонньообуттара, диэн иһитиннэрэр СӨ Муусука үрдүкү оскуолатын пресс-сулууспата.

Ахсынньы 12 күнүттэн көрөөччүлэр «Лена» киинэ тыйаатырыгар уонна Саха сирин үгүс улуустарыгар режиссердар Александр Лукин уонна Алексей Амбросьев-аччыгый туруорбут «Аптаах дорҕоон» остуоруйаларын көрүөхтэрэ.

Киинэ ис хоһооно көрөөччүнү абылаҥнаах Саҥа дьыллааҕы устуоруйаҕа киллэрэр. Муусука үрдүкү оскуолатын үс үөрэнээччитэ — Туйаара, Ньургун уонна Айтал – кыһыҥҥы сынньалаҥ кэмигэр  араас биричиинэнэн интэринээккэ хаалан хаалаллар. Былыргы скрипканы булан, кинилэр былыргы хара дьайы алҕас уһугуннаран кэбиһэллэр – бу Айхи диэн Саҥа Дьылы уоран баран, аан дойдуну сабардыыр былааннаах куһаҕан санаалаах колдун. Эдэр дьоруойдар бырааһынньыгы уонна бүтүн аан дойду кэлэр кэскилин быыһыыр туһугар хара дьайы утары охсуһуохтаахтар. Бу киирсиигэ хара дьайдыын утары охсуһар, бүтүн аан дойдуга эрэл сырдыгын аҕалар күүһүнэн муусука буолар.

Киинэҕэ ураты тыыны артыыстар биэрэллэр: эдэр мусукааннар, МҮО устудьуоннара уонна учууталлара, барыта 80-тан тахса киһи. Киинэни көрдөрүөхтэрин иннинэ оҕолор киинэҕэ хайдах уһуллубутттарын туһунан санааларын үллэһиннилэр. Кинилэр этэллэринэн, киинэҕэ уһуллуу интэриэһинэй, мүччүргэннээх сырыы эрэ курдук буолбакка, сыаналаммат уопутунан  буолбут. Оҕолор киинэ устуута айар дьоҕурдарын саҥа өрүттэрин арыйарга көмөлөспүтүн бэлиэтээтилэр.

Яна Байгожаева.