Араадьыйа күнүгэр дьоруой-суруналыыс Николай Кондакову кэриэстээтилэр

Араадьыйа уонна сибээс салаатын үлэһиттэрин күнүгэр, ыам ыйын 7 күнүгэр, Дьокуускайга Сэбиэскэй Сойуус Дьоруойа, биллиилээх суруналыыс, Аҕа дойду Улуу сэриитин кыттыылааҕа Николай Алексеевич Кондаков пааматынньыгар сибэкки дьөрбөтүн уурдулар.

Тэрээһиҥҥэ суруналыыстыка уопсастыбатын бэрэстэбиитэллэрэ, бэтэрээннэрэ, устудьуоннар уонна ыччаты кытта Ил Дархан Айсен Николаев кыттыыны ыллылар.

Айсен Николаев маассабай иһитиннэрэр сириэстибэлэр үлэһиттэригэр историческай өйдөбүнньүгү уонна патриотизмы тэрийиигэ киллэрэр кылааттарын суолталааҕын бэлиэтээтэ. Ил Дархан Николай Кондаков аатынан судаарыстыбаннай бириэмийэни туттарда. Наҕарааданы «Саха» ГТРК дириэктэрэ Ирина Гоголева өрөспүүбүлүкэ үтүө имиджин үөскэтиигэ уонна суруналыыстыка уобалаһыгар улахан кылааты киллэриигэ саамай элбэх уопсастыбаннай билиниини ылбыт таһаарыыларын иһин ылла.

«Бүгүн 15-с төгүлүн Сэбиэскэй Сойуус Дьоруойа Николай Кондаков аатынан бириэмийэ туттардыбыт. Кондаков Бүлүү улууһун аатырбыт саха саарына. Фронтан төннөн кэлэн, олоҕун өрөспүүбүлүкэ тэлэбиидэнньэтин, араадьыйатын сайдыытыгар анаабыта, төрөөбүт дойдутугар аһыныгас сыһыаны, тапталы иҥэрэргэ холобурунан буолбута. Бүгүн, Араадьыйа күнүгэр, Улуу Кыайыы күнүн көрсө эһиги, тэлэбиидэнньэ, араадьыйа уонна сибээс үлэһиттэрэ, дьиҥхнээх, кырдьыктаах, суһал информацияны биэриигэ сүрүн оруолу оонньуугут. Эһиги байыастар хорсун быһыыларын уонна күннээҕи олохторун-дьаһахтарын туһунан кэпсиигит, уопсастыбаннас санаатын үөскэтэҕит, дойдубут тыынын өйүүгүт», — диэтэ Айсен Николаев.

Николай Кондаков 1920 сыллаахха Бүлүү оройуонун Дьөккөн нэһилиэгэр төрөөбүтэ. Учууталтан суруналыыска тиийэ үүммүтэ, 1073- с аармыйа полкатын 2-с Украинскай фронт састаабыгар ийэ дойдубут көҥүлүн иһин охсуспута.