Салгыы
Араас омук оҕолоро — биир сомоҕо дьиэ кэргэҥҥэ

Араас омук оҕолоро — биир сомоҕо дьиэ кэргэҥҥэ

22.05.2025, 17:15
Хаартыска И.М. Слепцов тиксэриитэ
Бөлөххө киир:

Ыам ыйын 21 күнүгэр Дьокуускай куорат 13-с №-дээх оскуолатыгар Аҕа дойду Улуу сэриитигэр Кыайыы 80 сылыгар аналлаах “Биир сомоҕо дьиэ кэргэҥҥэ” диэн үгэскэ кубулуйбут бэстибээл ыытылынна.

Бэстибээл кыттыылаахтара араас омук култууратын, национальнай таҥаһын, үҥкүүтүн, ырыатын, үгэһин билиһиннэрдилэр.

Тэрээһин норуоттар сэлэлээн хаамыыларыттан саҕаланна. Араас омук оҕолор дьэрэкээн ойуулаах национальнай таҥастан саҕалаан интэриэһинэй үгэстэри билиһиннэрдилэр. Хас биирдии норуот түмсүүтэ көлүөнэттэн көлүөнэҕэ бэриллэн иһэр рецебинэн ураты астары бэлэмнээбит. Минньигэс астарынан кэлбит ыалдьыттары күндүлээтилэр.

Бэстибээл үөрүүлээх чааһын оскуола дириэктэрэ Иосиф Слепцов эҕэрдэ тылынан аста. Кини оҕону паториотическай уонна интернациональнай иитиигэ көхтөөхтүк кыттар учууталларга СӨ дьахталларын хамсааһынын аатыттан Махтал суруктары туттарда.

Оттон бэстибээл бочуоттаах ыалдьытынан Ил Түмэн дьокутаата, СӨ норуоттарын ассамблеятын бэрэссэдээтэлэ Александр Подголов  буолла. Кини Дьокуускай куорат 13-с №-дээх оскуолатын интернациональнай кулуубугар «Детское крыло Ассамблеи народов РС(Я)» ааты иҥэрэр туһунан сибидиэтэлистибэни туттарда.

Норуоттар доҕордоһууларын дьиэтин сүрүннүүр исписэлииһэ, СӨ Тас сибээскэ уонна норуоттар дьыалаларыгар министиэристибэтин норуоттар икки ардыларынааҕы сыһыаннаһыыларга уопсастыбаннай эспиэрдэрэ Мария Васильева таһаарыылаах үлэлээх учууталларга махтал суруктары туттарда.

“Биир сомоҕо дьиэ кэргэҥҥэ” бэстибээл араас омук култууратын билэр, билсэр бэртээхэй түгэҥҥэ кубулуйда. Мустубут дьон үгэстэрин, тылларын, култуураларын харыстыыр улахан суолталааҕын дьоҥҥо көрдөрдүлэр. Маннык тэрээһиннэр атын норуоттар култуурунай нэһилиэстибэлэригэр ытыктабыллаах буолууну, тулуурдаах буолууну үөскэтэллэр.

Бэстибээл түмүгүнэн, хас биирдии салаанан бастыҥнар быһаарылыннылар:

  • «Национальнай кухня» — «Молдаван» бэрэстэбиитэллэрин хамаандата.
  • «Бастыҥ быыстапка» — «Таджиктар» бэрэстэбиитэллэрин хамаандата.
  • «Народное декоративное искусство» — «Кыргызтар» бэрэстэбиитэллэрин хамаандата.
  • «Норуот айымньыта» — «Нуучча норуотун» бэрэстэбиитэллэрин хамаандата.
  • “Биир ньыгыл дьиэ кэргэҥҥэ” бэстибээл Гран-При хаһаайынынан “Молдаван” бэрэстэбиитэллэрин хамаандата буолла.

Тэрээһин кэмигэр норуоттар төрүт оонньуулара оонньонно.

Бары сонуннар
Салгыы
22 мая
  • 14°C
  • Ощущается: 12°Влажность: 23% Скорость ветра: 5 м/с

Сообщить об опечатке

Текст, который будет отправлен нашим редакторам: