Араас сылларга оскуоланы бүтэрбиттэр ыалдьыттаатылар

Н.Е. Мординов-Амма Аччыгыйа аатынан Харбалаахтааҕы үөрэхтээһин холбоһугар саҥа үөрэх дьылын саҕалааһын тэрээһинэ үрдүк таһымнаахтык ааста.

Ол курдук, киһи эрэ кэрэхсиэх, дириҥ ис хоһоонноох киэргэтии, хаартыскаҕа түһэргэ аналлаах муннук үөрэнээччилэри, төрөппүттэри умсугута угуйда. Онус кылаас үөрэнээччилэрэ Эмилия Федорова, Михаил Спиридонов бу эппиэттээх дьоро күнү олус бэркэ иилээн-саҕалаан ыыттылар. Сүрүн болҕомто быйыл оскуолаҕа саҥа киирэр кырачааннарга ананна. Холбоһук дириэктэрэ Анна Васильевна Мосоркина үөрэх дьыла аһыллыытынан эҕэрдэлээтэ, быйылгы уларыйыылары бэлиэтээн кэпсээтэ. Онтон 11 кылаас үөрэнээччилэрэ маҥнайгы кылааска киирэр оҕолору сиэтэн киллэрэн, сыанаҕа, бочуоттаах миэстэҕэ, туруордулар. Кырачааннары уһуйааҥҥа сайыннарбыт иитээччилэрэ Т.П.Мессеева, Н.И.Терякова арыаллаан аҕалбыттар. Оҕолор хоһоону да доргуччу аахтылар, ыллаан да эйээрдилэр.
Анна Васильевна маҥнайгы кылааска киирээччилэри, кинилэр төрөппүттэрин эҕэрдэлээтэ уонна Ил Дархан Айсен Николаев бэлэҕин «Күннүктэри» туттартаата. Бу «Күннүк» оҕолору күннээҕи олохторун сааһылыыр чугас доҕордоро, сүбэһиттэрэ буолуоҕун чопчулаан быһааран биэрдэ.
Сүрүн көмөлөһөр, өйүүр тэрилтэбит «Төлөн» ААУо генеральнай дириэктэрэ, Ил Түмэн дьокутаата Прокопий Дмитриевич Рахлеев тэрилтэ аатыттан истиҥ эҕэрдэтин тириэртэ уонна кырачааннарга бэлэҕин туттартаата. Хомус алыптаах дорҕоонун сыыйа тардан, хомусчут оҕолор эҕэрдэлэрэ тэрээһини сэргэхситтэ. Салгыы олохтоох дьаһалта аатыттан баһылык солбуйааччыта Анна Ивановна Васильева эҕэрдэлээтэ. Кини дьаһалта аатыттан маҥнайгы кылаас үөрэнээччилэригэр бэлэхтэри туттартаата.
Үйэ аҥаарын анараа өттүгэр оскуолабытын бүтэрбит выпускниктарбыт кэлэн ыалдьыттаан, бүгүҥҥү тэрээһин суолтатын өссө үрдэтэн биэрдилэр. Кинилэр ааттарыттан отчуот-эҕэрдэни Ньургустаана Серафимовна Харайданова тириэртэ. Светлана Ивановна Беркина салайааччылаах 10 «б» кылаас олус түмсүүлээҕин, бары өрөспүүбүлүкэ сайдыытыгар дьоһун кылааты киллэрсибиттэрин сэҥээрэ иһиттибит. Бу ыалдьыттар ортолоругар мас тардыһыытыгар өрөспүүбүлүкэ бастакы маастара, өр сылларга онкология балыыһатын салайбыт Петр Дмитриевич Каратаев баар. Кини 11 кылаастарга «Дьоһуннааҕы кэпсэтии» дьарыгар олус наадалаах сүбэлэри биэрдэ.
Маҥнайгы чуораан чугдааран, оҕо аймаҕы билии-көрүү, сайдыы айаныгар үөрэ-көтө ыҥырда!

Валентина КРИВОШАПКИНА, Харбалаах