Араҥас нэһилиэгэр саҥа баһылык талылынна

Бу ааспыт өрөбүлгэ, муус устар 9 күнүгэр, Мэҥэ Хаҥалас улууһун Араҥас (Тарат) нэһилиэгэр баһылыгы талар быыбар болдьох иннинэ буолан ааста.

265 №-дээх быыбардыыр учаастак дааннайынан нэһилиэнньэ 64,94 %-на кытынна. Нэһилиэккэ испииһэгинэн 231 быыбардааччы баар. Быыбарга икки хандьыдаат турбутуттан, биирэ – ЛДПР, иккиһэ – «Биир ньыгыл Арассыыйа» баартыйалартан. Быыбардааччылар 88,0 % куоластарын 1978 с.т., «Биир ньыгыл Арассыыйа» баартыйаттан турбут Кычкин Андрей Никитич ылла. Кини бу иннинэ Араҥас нэһилиэгин баһылыгын солбуйааччытынан үлэлээбитэ.

Оттон ЛДПР баартыйаттан турбут, «Саха» ГТРК филиалын араадьыйатын сулууспатын бырагыраамаларын ыытааччыта, 1993 с.т., Иванова Кыыдаана Андрияновна 10,67 % куолаһы ылла.
Ол курдук «Биир ньыгыл Арассыыйа» баартыйаттан турбут хандьыдаат Кычкин Андрей Никитич кыайан, Мэҥэ Хаҥалас улууһун Араҥас нэһилиэгин баһылыгынан талылынна.

Быыбар сокуон бары ирдэбиллэригэр сөп түбэһиннэрэн ыытылынна. Куоластааһын хаамыытын СӨ Уопсастыбаннай балаататыттан уонна хандьыдааттартан анаммыт дьон хонтуруоллаатылар. Сокуону кэһии туһунан үҥсүү бэлиэтэммэтэ.