Арассыыйа 17 эрэгийиэнигэр бэйдиэ сылдьар ыттары «утутууну»  көҥүллээтилэр

Урут сокуон бары субъектарга биир кэлим ирдэбили туруорара.

Судаарыстыбаннай Дуумаҕа бэйдиэ сылдьар ыттары төттөрү уулуссаҕа ыытары бобоору, ону тэҥэ кинилэри “утутары” көҥүллээри гыналлар. Арассыыйа 17 субъегар бэйдиэ сылдьар ыттары эвтаназиялааһыны көҥүллээтилэр, диэн РБК иһитиннэрэр.

2023 сылга Арассыыйа эрэгийиэннэрэ бэйдиэ сылдьар ыттары бэйэлэрэ  дьаһайар быраабы ыцлбыттара. Чуолаан, сорох эрэгийиэннэргэ нукутар көҥүллэммитэ.

Билигин хаһаайына суох ыттары маннык ньыманан дьаһайыы Арассыыйа 15 субъегар көҥүллэннэ. Кинилэр ортолоругар – Мурманскай уобалас, Астрахань уобалаһа, Ставропольскай кыраай, Оренбург уобалаһа, Самара уобалаһа, Удмуртия Өрөспүүбүлүкэтэ, Ханты-Мансийскай автономнай уокурук, Алтаай кыраайа, Тыва Өрөспүүбүлүкэтэ, Забайкалье кыраайа, Кемеровскай уобалас, Чукотка автономнай уокурук. Нукутуу Бурятияҕа, Саха сиригэр уонна Магадан уобалаһыгар эмиэ көҥүллэннэ, ол эрээри манна приюкка киирбит ыттары “уһун ууларыгар утуппаттар”. Өссө икки субъекка – Мордовияҕа уонна Хакасияҕа – көннөрүүлэр сотору күүһүгэр киириэхтэрэ.

Урут бары эрэгийиэннэргэ сокуоҥҥа олоҕуран биир ирдэбил баара: тутан ылан приюкка киллэрии, стерилизация, вакцинация, онтон дьоҥҥо куттала, ытырыыга суох ыттары төттөрү сылдьар сирдэригэр таһаарыы.

Судаарыстыбаннай Дуумаҕа оҕолору дьэллик ыттартан харыстыыр сокуону торумнууллар.

Госдуума бэрэссэдээтэлэ Вячеслав Володин дьиэ кэргэни көмүскээһиҥҥэ, аҕа, ийэ буолуу уонна оҕо саас боппуруостарыгар кэмитиэтигэр атын туһааннаах кэмитиэттэри кытта бэйдиэ ыттартан оҕолору көмүскүүр нуормалары бэлэмнииргэ эрдэ соруйбута. Нөҥүө күнүгэр КПРФ-тан дьокутаат Михаил Матвеев олохтоох былаастар тутуллубут ыттары төттөрү уулуссаҕа ыытыыларын бобууну федеральнай ирдэбилгэ бигэргэтэргэ этии киллэрбитэ. Кини ону тэҥэ тутуллубут ыт 30 күнтэн итэҕэһэ суох приюкка тутууга сытарын уонна эрэгийиэннэргэ бу болдьоҕу бэйэлэрин көрүүлэринэн улаатыннарыыларын сокуоҥҥа суруйарга этии киллэрбитэ.

Доруобуйа харыстабылыгар кэмитиэтин чилиэнэ Бийсултан Хамзаев иһитиннэрбитинэн, 2024 сылга дьэллик ыттар саба түһүүлэриттэн Арассыыйа 237 тыһыынча олохтооҕо эмсэҕэлээбит. Туһанылла сылдьар сокуоннас гражданнары маннык түбэлтэлэртэн кыайан көмүскээбэт диэн кини этэр.

Кэнники ыйга Арассыыйаҕа ыттар оҕолорго саба түһүүлэрин хас да түгэнэ бэлиэтэннэ. Олунньу ый саҥатыгар Хабаровскай кыраай Николаевск-на-Амуре куоратыгар уон саастаах кыыска дьэллик ыттар саба түспүттэрэ. Үөрэнээччини эт-сиин араас эчэйиилээх балыыһаҕа киллэрбиттэрэ. Оттон Ставропольга үөрүнэн сылдьар ыттартан тоҕус саастаах оҕо суорума суолламмыта. Эрэгийиэн губернатора Владимир Владимиров  маннык ыттары кытта дьарыктанар тэрилтэлэр үлэлэрин бэрэбиэркэлииргэ соруйбута.

Сиһилии РБК Life ааҕыҥ.