Арассыыйа, аан дойду спордун инники кэскилэ «Азия оҕолоругар» түмүлүннэ

Н.Тарскай аатынан «Туймаада» стадиоҥҥа 8-с төгүлүн ыытыллар «Азия оҕолоро» норуоттар икки ардыларынааҕы спортивнай оонньуулар түмүктэнэр түгэннэрэ үүннэ.

Бу 11 күн устата күүрээннээх күрэхтэһиилэри, кыайыы өрөгөйүн, хотторуу хомолтотун көрдүбүт-иһиттибит. Саамай сүрүнэ, бу оонньуулар оҕолорго инники кыайыыларыгар үктэл буолаллар. «Азия оҕолорун» мээнэҕэ »оҕо олимпийскай оонньуулара» диэн ааттаабаттар.

Дьэ, стадион устун чөмпүйүөннэр, призердар парааттаан киирдилэр.
Саамай элбэх мэтээллэнэн, Узбекистан хамаандата чорбойон, 1-кы миэстэҕэ таҕыста. Онтон Сибиирдээҕи уокурук, Беларусь хамаандалара таҕыстылар. Саха сирин хамаандата төрдүс буолла.

Кэнники кэмҥэ «Азия оҕолоро» Кемерово, Владивосток куораттарга буолбуттара, быйыл төрүттэммит куораттарыгар төннөн, үрдүк таһымҥа ыытылыннылар.
Бехруз Салимов, Узбекистан хамаандатыттан чөмпүйүөннээбит уол, оҕолор ааттарыттан харда тыл эттэ.

— Саха сиригэр олус махтанабыт! Биһиги бука бары мэтээллээх дойдубутугар төннүбэппит, ол эрээри бары олус үчүгэй өйдөбүллээх, санаалаах баран эрэбит. Бу курдук оҕо спордун бырааһынньыга өрөгөйдүү турдун, »Азия оҕолоро» куруук баар буоллун!- диэн эттэ.
Дмитрий Чернышенко, РФ бырабыыталыстыбатын бэрэссэдээтэлин солбуйааччы:

— Ахсыс оонньууларга 24 Азия дойдулара кытыннылар, спорт чаҕылхай түгэннэрин бэлэхтээтилэр. Бу турнир дойдулар  тэҥ бырааптаах аан дойдутааҕы бииргэ үлэлэһииргэ дьулуһууларын көрдөрдө. Бэрэсидьиэн чопчу маннык соругу туруорбута. Аһаҕас, чиэһинэй күрэхтэһиилэр — бу маннык бириинсиби тутуһар оонньуулар буолан аастылар. 3 тыһыынчаттан тахса талааннаах эдэр спортсменнар кытынна. Бу оонньуу кинилэргэ туохха да тэҥнэспэт уопут буолар.

Чаҕылхай күрэхтэһиилэр саҥа рекордары бэлэхтээтилэр: 3 тыһыынча миэтэрэҕэ сүүрүүгэ уонна «куобах» ыстаныыга. Тэрийээччилэргэ, волонтердарга, спортсменнарга, ыалдьааччыларга махтанабыт! Ыалдьытымсах Саха сирэ, махтал! Дойдубутугар «Азия оҕолоро» оҕо, ыччат спордун сайдыытыгар улахан кылааты киллэрэллэр. 2027 сылга кыһыҥҥы оонньуулар буолуохтара. Онно өссө элбэх спортсмены күүтэбит! — диэн эттэ.

Ил Дархан Айсен Николаев:

— Эдэр спортсменнарынан киэн туттабын! Тэрийээччилэргэ, судьуйаларга, тириэнньэрдэргэ, волонтердарга махтанабын! Бары түмсэн, оҕо саас, доҕордоһуу чаҕылхай бырааһынньыга бэркэ ааһарын ситистибит.
Азия олимпийскай сэбиэтигэр, Арассыыйа олимпийскай кэмитиэтигэр, РФ  бырабыыталыстыбатыгар уонна бэрэсидиэҥҥэ тус болҕомтотун, өйөбүлүн иһин махтанабын!
36 кыһыл көмүс мэтээли ылбыт Узбекистан, 31 кыһыл көмүс мэтээллээх Сибиир уокуругун, 27 кыһыл көмүс мэтээллээх Беларусь, уонна, биллэн турар, 25 кыһыл көмүс мэтээллээх Саха сирин бастакы хамаандатын ис сүрэхтэн эҕэрдэлиибин!
Саха сиригэр үөскээбит доҕордоһуу, бырааттыы сыһыан эһигини олоххут устун арыаллаатын! Саха сирэ эһигинэн киэн туттар! — диэтэ.

«Азия оҕолорун» дириэксийэтин дириэктэрэ Владимир Максимов:

— Улахан спорт инникитэ бу оонньууларга баар. Бу оҕолор — аан дойдутааҕы, Арассыыйатааҕы спорт, олимпийскай оонньуулар  кэнэҕэски чөмпүйүөннэрэ буолаллар. »Азия оҕолорун» выпускниктарын сойууһа көлүөнэлэр быстыбат утумнарын көрдөрөр. Биһиги сойууспут өссө 1930 выпускнигынан эбилиннэ. Кинилэр уонча сылынан эрчийэр оҕолорун илдьэ кыайыы көтөллөөх эргиллэн кэлиэхтэрэ диэн эрэнэбин. Барыта саҥа саҕаланар! — диэн тоһоҕолоон бэлиэтээтэ.

Кини 8-с оонньуулар сабыллыбыттарын биллэрдэ. Маны тэҥэ, оонньуулар былаахтарын кадетскай оскуола оҕолоро түһэрэн, стадион устун илтилэр. Онтон былааҕы чөмпүйүөн оҕолор хабан ыллылар.
Мантан салгыы «Биһиги — Азия оҕолоробут! Биһиги — Күн оҕолоробут!» диэн чаҕылхай туруоруу саҕаланна.
Режиссер — Михаил Степанов.