Арассыыйа бастыҥ мас-рестлердэрэ Нерюнгригэ чөмпүйэнээккэ кыттаары сүүмэрдээһини ааһаллар

Дойду федеральнай уокуруктарынан Нерюнгри куоракка кулун тутар 19-23 күннэригэр ыытыллар Арассыыйа чөмпүйэнээтигэр кыттарга сүүмэрдиир күрэхтэһиилэр ыытыллаллар.

Ааспыт өрөбүлгэ Москва уобалаһын Люберцы куоратыгар мас тардыһыытыгар (мас-рестлинг) федеральнай уокурукка бастыыр иһин күрэхтэһии уонна чөмпүйэнээт ыытылыннылар.

Күрэхтэһиигэ Арассыыйа 9 эрэгийиэниттэн 194 спортсмен кытынна. Москва куорат хамаандата бастаан, биэс кыһыл, биэс үрүҥ көмүс, 1 боруонса мэтээл хаһаайынынан буолла. Мас-рестлердэр бөдөҥ күрэхтэһиилэрэ олунньу 28 күнүгэр Башкортостан Өрөспүүбүлүкэтин Уфа куоратыгар буолуоҕа. Онно чөмпүйэнээккэ уонна Приволжьетааҕы федеральнай уокурукка бастыыр иһин күрэхтэһии күүтүллэр.

Санаттахха, Саха сирин историятыгар аан бастаан Нерюнгригэ мас-рестлиҥҥэ Арассыыйа XI чөмпүйэнээтэ ыытыллар.  Онон манна дойду 30 эрэгийиэниттэн 200 тахса спортсмен түмсүөҕэ. Саха сирин баһылыга Айсен Николаев Нерюнгригэ күрэхтэһиини ыытыыны өрөспүүбүлүкэ успуорт национальнай көрүҥнэрин сайыннарыыга киллэрэр кылаатын билинии курдук сыаналаабыта. Кини манна баар сөптөөх инфраструктура норуоттар икки ардыларынааҕы, Бүтүн Арассыыйатааҕы, өрөспүүбүлүкэтээҕи таһымнаах тэрээһиннэри ыытар кыахтааҕын бэлиэтээбитэ. Тэрийэр кэмитиэти Саха сирин Бырабыыталыстыбатын Бэрэссэдээтэлин солбуйааччы Сергей Местников салайар. Чөмпүйэнээт 2026 сылга Арассыыйа успуорка министиэристибэтин Биир кэлим халандаарын былааныгар киллэриллибитэ. “О физической культуре и спорте в Российской Федерации” сокуоҥҥа көннөрүүлэри киллэриигэ илии баттаабыт Владимир Путин Саха сиригэр успуорт национальнай көрүҥнэрин сайыннарыыны көҕүлээбитэ.  Саҥа сокуон ылыныллыбытын кэннэ хапсаҕай, мас-рестлинг, ыстаҥа өссө күүскэ сайдаллар. Успуорт маннык көрүҥнэрин сайыннарар уопсастыбаннай тэрилтэлэр судаарыстыбаннай аккредитацияны ыллылар.

“Биһиги успуорпут национальнай көрүҥнэрин эйгэтигэр үтүө уларыйыылар олус суолталаахтар”, — диэн Арассыыйа Бэрэсидьиэнэ Владимир Путин бэлиэтээбитэ. Уонна 2026 сылы Норуоттар сомоҕолоһууларын сылынан биллэрбитэ дьоһун суолталаах.

sakha.gov.ru

Сиһилии: https://www.sakha.gov.ru/news/26427