Арассыыйа бэрэсидьиэнин быыбара кулун тутарга ыытыллыаҕа

Федерация Сэбиэтэ ахсынньы 7 күнүнээҕи мунньаҕынан Арассыыйа бэрэсидьиэнин быыбарын эһиил кулун тутар 17 күнүгэр ыытарга бигэргэттэ.

Санатан эттэххэ, Арассыыйа бэрэсидьиэнин быыбара сокуонунан Федерация Сэбиэтинэн бигэргэтиллэр. “Бэрэсидьиэн быыбара дойду биир улахан бэлиэ күнүнэн буолар. Бу күн Арассыыйа инники сайдыытын быһаарабыт”, — диэн мунньах кэмигэр Федерация Сэбиэтин бэрэссэдээтэлэ Валентина Матвиенко бэлиэтээн эттэ.

Арассыыйа быыбарын киин хамыыһыйатын бэрэссэдээтэлэ Элла Памфилова бэлиэтээбитинэн, куоластааһын үгэс курдук үс күн устата ыытыллыаҕа. Онон быыбар кулун тутар 15-17 күннэригэр буолуоҕа. Санатан эттэххэ, маннык систиэмэ бастакытын хамсык кэмигэр ыытыллыбыта. Оттон болдьоҕун иннинэ куоластааһын, Быыбар киин хамыыһыйата иһитиннэрбитинэн,  эһиил олунньу 25 күнүттэн кулун тутар 14 күнүгэр диэри буолуоҕа.