Арассыыйа былааҕын күнүгэр триколору тэнитиэхтэрэ

Саха сирин үрдүнэн атырдьах ыйын 21-29 кк. диэри РФ Судаарыстыбаннай былааҕын күнүгэр анаммыт тэрээһиннэр ыытыллыахтара.

Сүрүн тэрээһиннэртэн биирдэстэринэн Дьокуускайга Өрөспүүбүлүкэ болуоссатыгар ыччаттар уонна уопсастыбанньыктар кыттыылаах ыытыллар «Арассыыйа триколора» аахсыйа буолуоҕа. 150 киһи 20х35 миэтэрэ кээмэйдээх Арассыыйа улахан былааҕын тэнитиэҕэ. Улуус кииннэрин сүрүн болуоссаттарыгар, Култуура дьиэлэригэр бырааһынньыкка анаммыт миитиннэр, үөрүүлээх мунньахтар ыытыллыахтара. Бибилэтиэкэлэргэ, кулууптарга кинигэ быыстапкалара тэриллиэхтэрэ, уруоктар, викториналар, аахсыйалар ыытыллыахтара.

Холобур, өрөспүүбүлүкэ Национальнай бибилэтиэкэтигэр «Арассыыйа албан ааттаах триколора» диэн кинигэ быыстапката туруоруллуоҕа. Саха сирин олохтоохторо «Арассыыйа түннүктэрэ» Бүтүн Арассыыйатааҕы аахсыйаҕа кыттыһыахтара. Олорор дьиэлэргэ уонна үөрэх тэрилтэлэригэр түннүктэр Арассыыйа былааҕын уонна Арассыыйаны кытта ситимнээх ойууларынан киэргэтиллиэхтэрэ.

«Триколор» аахсыйа чэрчитинэн триколор-лиэнтэлэри түҥэтиэхтэрэ. «Норуот дьаралыга» аахсыйа кэмигэр, дойду биир сүрүн дьаралыгын тутан туран, бэйэлэрин нэһилиэнньэлээх пууннарын кэрэ-бэлиэ сирин туһаайыытыгар хаартыскаҕа түһүөхтэрэ.

Атырдьах ыйын 22 күнүгэр Сунтаар улууһугар «Турсун-2025» ыччат өрөспүүбүлүкэтээҕи туристическай мунньаҕа арыллыаҕа.

Дьокуускайга «Арассыыйа – мин устуоруйам» историческай пааркаҕа атырдьах ыйын 22 күнүгэр 11:00 чаастан «Киэн тутта ыйанан тэлимниир Арассыыйа былааҕа…» диэн үөрүүлээх тэрээһин саҕаланыаҕа. Дьокуускай куорат болуоссаттарыгар, Култуура уонна сынньалаҥ пааркатыгар «Держава былааҕа – албан аат дьаралыга!» аахсыйа кэмигэр Арассыыйа Федерациятын былаахтарын түҥэтиэхтэрэ.

Бырааһынньык күнүгэр Култуура уонна сынньалаҥ пааркатыгар оҕолорго уонна улахан дьоҥҥо аниматордардаах «Кустуктуу сырдык оҕо саас» аралдьытар бырагыраамаҕа, «Биһиги – Арассыыйа кэскилэ!» култуурунай бырагыраамаҕа, «Арассыыйа туһунан квиз» интеллектуальнай викторинаҕа кыттар кыах баар.

Доҕордоһуу болуоссатыгар 12:00 чаастан 14 саастарын туолбут гражданнарга пааспар туттарыыта уонна бырааһынньыктааҕы кэнсиэр буолуоҕа.

15:00 чаастан «Лена» киинэ тыйаатырыттан бэлисипиэтинэн сүүрүү саҕаланыаҕа, оттон 20:00 чаастан Кыайыы пааркатыттан – «Арассыыйа былааҕа» тырааныспар параада. Ону таһынан, тырааныспарынан параадтар өрөспүүбүлүкэ улуустарыгар эмиэ ыытыллыахтара.

Норуоттар доҕордоһууларын дьиэтигэр 17:00 чаастан «Доҕордоһуу триколора» норуоттар икки ардыларынааҕы бырайыак көрдөрүллүөҕэ.

РФ Судаарыстыбаннай былааҕын күнэ 1994 сыллаахха дойду Бэрэсидьиэнин ыйааҕынан олохтоммута уонна сыл аайы атырдьах ыйын 22 күнүгэр бэлиэтэнэр.