Хаартыска: www.sakha.gov.ru
Ытыктабыллаах Саха сирин олохтоохторо!
Саха Өрөспүүбүлүкэтин салалтатын уонна тус бэйэм ааппыттан Россия Федерациятын Судаарыстыбаннай былааҕын күнүнэн эҕэрдэлиибин!
Уруккуну уонна бүгүҥҥү күнү биир ситимниир бу бырааһынньык дойдубут устуоруйатын уонна култууратын үйэлээх баайын чөл хаалларыы уонна сайыннарыы дьоһун суолтатын бэлиэтиир. 1991 сыл атырдьах ыйын 22 күнүгэр РСФСР Үрдүкү Сэбиэтин Уурааҕынан устуоруйаҕа киирбит Арассыыйа былааҕа Арассыыйа Федерациятын Национальнай былааҕынан билиниллибитэ. Үрүҥ, күөх, кыһыл өҥнөөх былаах улуу дойду модун кыаҕын уонна тутулуга суоҕун кэрэһилиир, бу былааҕы күөрэччи тутан үгүс кыргыһыыга кыайбыппыт, үлэҕэ ситиһиилэрбитин үйэтиппиппит. Бүгүн эмиэ албан ааттаах былаахпыт элбэх омуктаах норуоппутун тулхадыйбат сыаннастарбыт уонна үгэстэрбит тула түмэр.
Саха сирэ түөрт үйэ кэриҥэ Арассыыйа судаарыстыбата чэчирии сайдарыгар дьоһун кылаатын киллэрэр. Биһиги өрөспүүбүлүкэбит – Арассыыйа хотугулуу-илиҥҥи өттүн бигэ тирэҕэ, дойду хотугу кыраныыссатын бөҕө-таҕа куйаҕа.
Арассыыйа бары олохтоохторун курдук, Саха сирин дьоно-сэргэтэ таһаарыылаах үлэлэринэн киһи хапытаалын, экэниэмикэ салааларын уонна социальнай эйгэни сайыннарарга дьоһун кылаатын киллэрэр. Оҕо төрөөһүнүн таһымынан биһиги өрөспүүбүлүкэбит Уһук Илиҥҥэ бастакы миэстэлээх, ону тэҥэ дойду уон бастыҥ эрэгийиэнин иһигэр киирэр.
Өрөспүүбүлүкэ экэниэмикэтэ бигэ туруктаах, далааһыннаах бырайыактары олоххо киллэрэргэ үлэ ыытыллар, куораттарга уонна тыа сиригэр олорор дьиэлэри, оскуолалары уонна уһуйааннары, балыыһалары уонна поликлиникалары, суоллары уонна муосталары, инфраструктура, култуура уонна успуорт эбийиэктэрин тутуу киэҥник барар.
Биһиги уолаттарбыт Аҕа дойду кэлэр кэскилин түстүүр кыргыһыыга хорсуннук кытталлар. Сомоҕолоһуубут уонна булгуруйбат санаабыт Кыайыыга сирдиир, Арассыыйа сайдыылаах олоххо суолун-ииһин солуур. Биһиги дойдубутунан уонна былаахпытынан киэн туттабыт.
Бүгүҥҥү бырааһынньыгы чиэстээн Саха сирин сүрүн болуоссатыгар – Өрөспүүбүлүкэ болуоссатыгар ыччаппыт уонна уопсастыбаннас Арассыыйа баараҕай былааҕын үөрүүлээх быһыыга-майгыга тэнитиэхтэрэ. Кыайыы 80 сылыгар биһиги хотугу сирбит халлаанын анныгар киэн туттуулаах тэнитиллибит былаах көлүөнэлэр утумнаһыыларын ураты кэрэһитинэн буолуоҕа. Бу күн кэнчээри ыччат Арассыыйа Федерациятын гражданинын пааспарын тутуоҕа. Үгэс курдук өрөспүүбүлүкэ куораттарыгар уонна сэлиэнньэлэригэр болуоссаттарга уонна култуура дьиэлэригэр, түмэллэргэ уонна бибилэтиэкэлэргэ “Дойду былааҕа – албан аат бэлиэтэ!” аахсыйа, “Доҕордоһуу былааҕа” бырайыак, миитиннэр, үөрүүлээх мунньахтар, кэнсиэрдэр, викториналар, массыынанан айан уо.д.а. атын тэрээһиннэр буолуохтара.
Маннык тэрээһиннэргэ сылдьан ыччаппыт, оҕолорбут Арассыыйа устуоруйатыгар, символикатыгар ытыктабыллаах сыһыаҥҥа уһуйуллаллар. Судаарыстыбаннай былаахпыт үүнэр көлүөнэни Ийэ дойдуга таптал тыыныгар иитии иһин, дойдубут сарсыҥҥытын туһугар биһиги эппиэтинэспитин санатыахтын, хас биирдиибитигэр сарсыҥҥы күҥҥэ эрэли саҕыахтын, Аҕа дойдубут туһугар айымньылаах үлэҕэ кынаттыы туруохтун.
Күндү доҕоттор! Бу кэрэ-бэлиэ күн эһиэхэ или, эйэни, чэгиэн туругу, уҕараабат эрчими, таһаарыылаах үлэни, дьолу-соргуну баҕарабын!
Саха Өрөспүүбүлүкэтин Ил Дархана
Айсен Николаев
Кэлэр нэдиэлэҕэ, атырдьах ыйын 30 күнүгэр, Дьокуускайга 100 км сүүрүүгэ Арассыыйа чөмпүйэнээтэ ыытыллыаҕа. 100 км…
Халаан иккис долгунун содулун туоратыыга нэһилиэнньэҕэ көмөнү оҥорорго Өймөкөөн улууһугар эбии күүһү ыыттылар. Бу туһунан…
Арассыыйа Доруобуйатын харыстабылын министиэристибэтин көҕүлээһининэн, атырдьах ыйын 18-24 күннэригэр Арыгыттан аккаастаныы нэдиэлэтэ биллэриллибитэ. Нэдиэлэ сыала-соруга…
Бүгүн, атырдьах ыйын 22 күнүгэр, Арассыыйа былааҕын күнүгэр Дьокуускай киинигэр 35 миэтэрэ уһуннаах уонна 23…
Дьокуускайга «Гордо реет флаг российский…» диэн 100-тэн тахса кыттааччылаах дириҥ ис хоһоонноох тэрээһин буолан ааста.…
Булуҥ улууһун Тиксии бөһүөлэгэр Оҕо уус-уран айымньытын дьиэтигэр «Дьиэ кэргэн» национальнай бырайыак «Дьиэ кэргэн сыаннастара…