Арассыыйа бырабыыталыстыбата наадалаах эмп препараттарын испииһэгин кэҥэттэ

Арассыыйа Бырабыыталыстыбата соторутааҕыта олоххо саамай наадалаах уонна суолталаах эмп препараттарын (ЖНВЛП) испииһэгин кэҥэттэ. Искэн, генетическэй, дьарҕарбыт, аутоиммуннай, сүрэх-тымыр уонна сыстыганнаах ыарыылары эмтииргэ аналлаах саҥа эмтэри киллэрэн биэрдэ.

Саҥардыллыбыт испииһэккэ анемияны, нейтропенияны, рецидивирующай перикардиты, түбүркүлүөһү уонна да атын  ыарыылары эмтииргэ анаммыт аҕыс саҥа препарат киирдэ. Эбии киирбит препараттар истэригэр – капивасертиб, камрелизумаб, даролутамид, лорлатиниб, луспатерцепт, претоманид, пэгфилграстим уонна гофликицепт бааллар.

ЖНВЛП испииһэгэр киирбит эмтэр сыаналарын судаарыстыба бэрээдэктиэҕэ. Оччоҕо босхо мэдиссиинэ өҥөтүн бырагырааматын чэрчитинэн наадалаах эминэн хааччыйыы тиийимтиэ буолуоҕа. Уопсайынан, ЖНВЛП испииһэгэр билигин 827 эмп баар, онтон 666 (80,5%) Арассыыйа территориятыгар оҥоһуллаллар.

Михаил Мишустин кэлэр биэс сыл иһигэр Арассыыйа препараттарын оҥоруу 90%-ҥа диэри улаатара былааннанарын туһунан эмиэ эттэ. Тустаах көҕүлээһиннэр ордук ыараханнык ыалдьар дьону наадалаах эминэн хааччыйыыга туһуланаллар, бу 2030 сылга диэри национальнай бырайыак уонна Доруобуйа харыстабылын сайдыытын Стратегиятын сорҕото буолар.