“Арассыыйа” быыстапкаҕа Саха сирин туһунан үөрэх марафона буолла

Москваҕа “Арассыыйа” быыстапка-пуорумҥа эрэгийиэннэр күннэрин иитинэн, Саха сирин үгэстэрин уонна килиимэтин уратытын туһунан үөрэх марафона буолан ааста. “Билии” уопсастыба лекторийын былааһаккатын көрөөччүлэригэр аналлаах тэрээһини “Хоту: бигэтик сайдар территория” аан дойду таһымнаах билим-үөрэх киинэ ыытта.

Марафон чэрчитинэн П.И. Мельников аатынан РНА Сибиирдээҕи салаатын Ирбэт тоҥ институтуттан уонна М.К. Аммосов аатынан ХИФУ ирбэт тоҥ эйгэтин үөрэтэр учуонай Никита Тананаев билим-киэҥник тарҕаммыт ток-шоу көрүҥүнэн Саха сирин килиимэтин уратытын туһунан кэпсээтэ уонна тэрээһин көхтөөх кыттааччыларын ортотугар илии метео-ыстаансыйатын оонньотто. Арктикатааҕы култуура уонна ускуустуба институтуттан Зоя Стрекаловская уонна Диана Петухова “Олоҥхону аныгы толорооччу – үгэһи утумнааччы” тиэмэҕэ  сэминээр-практикум ыытыллар. Туруорууну иллюзионист-хомусчут Сергей Дубовиков хомуска тардан уонна ситиһиилээх иллюзионист Дьулустан Павлов киэргэттилэр.

“Маннык тэрээһиннэр араас тиэмэлээх билим чинчийиилэрин тиийимтиэ, кэрэхсэбиллээх уонна сэргэх көрүҥүнэн билиһиннэрэргэ көмөлөһөллөр. Сотору “Хоту” киин экосистиэмэтигэр билим элбэх лиэксийэлэрэ тахсыахтара. Холобур, сэтинньи 16 күнүгэр Дьокуускайга Билим бастакы хотугу слэма ыытыллыаҕа, ол иитинэн биэс эдэр учуонай бэйэлэрин технологияларын туһунан кылгас уонна чаҕылхай көрүҥүнэн кэпсиэхтэрэ”, — диэн “Хоту” билим-үөрэх киинин салайааччыта Евгений Колганов бэлиэтиир.

“Арассыыйа” норуоттар икки ардыларынааҕы быыстапка-пуорум бэрэсидьиэн Владимир Путин сорудаҕынан, 2023 сыл сэтинньи 4 күнүттэн 2024 сыл муус устар 12 күнүгэр диэри ыытыллар. Тэрээһиҥҥэ дойду суолталаах ситиһиилэрин уонна эрэгийиэннэр сайдыыларын үтүө уопутун көрдөрөллөр.

Ил Дархан уонна Бырабыыталыстыба пресс-сулууспата.